DILI, 15 janeiru 2024 (TATOLI)- Ermenegilda da Costa Laurentina, temporariamente substitui Deputada hosi bankada Partidu Libertasaun Populár (PLP), Maria Angelina Lopes Sarmento.
“Asuntu substituisaun temporária Deputada bankada PLP, Maria Angelina Lopes Sarmento tanba kondisaun saúde, nune’e hato’o pedidu hodi subtitui hosi Deputada Ermenegilda da Costa Laurentina, kandidatura númeru neen (6) lista iha Komisaun Nasionál Eleisaun (CNE, siglá portugés), hahú hosi 15 janeiru to’o 09 fevereiru 2024,” Sekretária Meza PN, Deputada Virgina Ana Belo, fó sai iha reuniaun plenária PN, segunda ne’e.
Substituisaun temporária previstu iha artigu 4 alínea a, 5 ho 9 númeru 1 hosi lei númeru 5/2004, 05 maiu no lei númeru 2/2006 kona-ba Lei Eleitorál Parlamentu Nasionál no artigu 5 rejimentu Parlamentu Nasionál (PN).
Nune’e, bankada PLP hato’o pedidu no husu konsiderasaun kolaborasaun Prezidente Parlamentu Nasionál (PPN) nian.
Nune’e, Prezidente Parlamentu Nasionál, Maria Fernanda Lay, hato’o bem-vindu no konvida eis Prezidente Institutu Jestaun Ekipamentu (IJE) Deputada Ermenegilda da Costa Laurentina hodi hola fatin iha sala plenária.
“Hodi nune’e, benvindu no konvida Deputada Ermenegilda hola fatin,” Prezidente Parlamentu Nasionál hateten.
Jornalista : Nelson de Sousa
Editór : Cancio Ximenes
