DILI, 26 janeiru 2024 (TATOLI)—Governu Timor-Leste liuhosi Primeiru-Ministru, Kay Rala Xanana Gusmão, no Governu Indonézia liuhosi Prezidente Repúblika Indonézia Joko Widodo, sesta ne’e, liuhosi enkontru bilaterál diskute fronteira terrestre entre Timor-Leste no Indonézia.
Primeiru-Ministru, Kay Rala Xanana Gusmão, hateten, enkontru bilaterál ne’e atu hametin relasaun entre Timor-Leste no Indonézia, no atu dezenvolve servisu hamutuk pozitivu liuliu apresia ba servisu ekipa fronteira terrestre durante ne’e.
“Ha’u apresia ba servisu ekipa fronteira negosiasaun terrestre atu finaliza akordu entre Timor-Leste no Indonézia. Ami konkorda kona-ba land border no fronteira terrestre, ezetu segementu naun-rezolvidu Noel Besi-Citrana Oe-cusse,” Xefe Governu nee hateten ba jornalista sira liuhosi konferénsia imprensa konjunta entre PM Xanana ho PR Jokowi hafoin hala’o enkontru bilaterál hodi asina memoradu entendimenteu entre akordu MOU ho MTKI ho ministru telekomunikasaun Indonézia no MPIE ho ministru obra públika Indonézia, iha Istana Bogor, sesta ne’e.
Notísia relevante : Xanana seidauk foti desizaun kona-ba Naktuka
Oras ne’e, Xanana hateten, atu ba entendimentu ida-ne’ebe klaru liu kona-ba isu no fiar katak iha futuru Timor-Leste no Indonézia sei hetan solusaun hosi problema ne’e.
Prezidente Repúblika Indonézia, Joko Widodo, hateten iha enkontru bilaterál diskute asuntu lubuk ida, dahuluk mak konkorda atu rezolve tratadu fronteira entre nasaun Timor-Leste no Indonézia hodi apresia ho joint boundry committee atu haree ba fronteira terrestre.
Daruak, Timor-Leste ho Indonézia konkorda atu dezenvolve kompromisu Governu Timor-leste atu kria iklima investimentu ne’ebé di’ak, liuhosi akordu protesaun investimentu
Jokowi fó apresiasaun ba konfiansa hosi Timor-Leste ba BUMN Indonézia iha projetu oioin hanesan dezenvolvimentu dalan iha Oé-Cusse no mós halo luan aeroportu internasionál Prerzidente Nicolau Lobato Comoro, Dili.
Ho asina akordu bilaterál kona-ba teknolojia informasaun, hala’o servisu hamutuk iha infraestrutura telekomunikasaun inklui planu investimentu fiber optika.
Dahaat, ligasaun ho ASEAN, Indonézia iha kompromisu atu apoiu Timor-Leste adere ba ASEAN.
Iha enkontru bilaterál ne’e, perante Xefe Governu Timor-Leste no Xefe Estadu Indonézia nia oin, Ministru Transporte no Komunikasaun Timor-Leste, Miguel Marques Gonçalves Manetelu, asina memorandu entendimentu ho Ministru Komunikasaun no Informátika Repúblika Indonézia, Budi Arie Setiadi, ba kooperasaun iha área komunikasaun no informátika.
Iha momorandu entendimentu ne’e mós hala’o ba kooperasaun iha área edukasaun no formasaun iha área transporte nian.
Iha biban ne’e, Ministru Planeamentu no Investimentu Estratéjiku Repúblika Demokrátika Timor-Leste no Minisru Obra Públika no Abitasaun Repúblika Indonézia, Basuki Hadimuljono, asina memorandu entendimentu ba kooperasaun iha área dezenvolvimentu infraestrutura.
Iha serimónia asina memorandu entendimentu ne’e, Primeiru-Ministu, Kay Rala Xanana Gusmão, akompaña hosi Ministru Negosiu Estranjeiru no Kooperasaun, Bendito Freitas, Ministru Planeamentu no Investimentu Estratejiku, Gastao Sousa, Ministru Transporte no Telekomunikasaun, Miguel Manetelo no Sekretariu Estadu Komunikasaun Sosial, Expedito Loro Dias Ximenes no enkarregadu embaixada Timor-Leste iha Indonézia.
Jornalista : Cancio Ximenes
Editór : Rafael Ximenes de A. Belo
