DILI, 01 fevereiru 2024 (TATOLI) – Reprezentante Xefe Estadu Maiór Jenerál Ezérsitu Portugal Vise-Amirante José Nuno dos Santos, kompromete kontinua apoiu ba dezenvolvimentu Falintil-Forsa Defeza Timor-Leste (F-FDTL).
Vise-Amirante José Nuno dos Santos mai Timor-Leste hodi kumpre konvite ne’ebé fó hosi Xefe Estadu Maiór Jenerál F-FDTL, Tenente Jenerál Domingos Raul Falur Rate Laek hodi mai partisipa aniversáriu tranaformasaun FALINTIL ba F-FDTL ba dala-23 ne’ebé hala’o iha sesta (2/2).
Iha vizita kortejia ne’e José Nuno dos Santos hato’o nia prontidaun hodi kompromete katak kontinua apoia ba dezenvolvimentu forsa armada Timor-Leste liuhosi kuadru koooperasaun militár ne’ebé antes ne’e Governu TL no Portugál estabelese ona.
Tenente Jenerál Domingos Raul Falur Rate Laek, hateten Portugal iha kompromisu atu mantein kooperasaun liuhosi formasaun ba rekursu umanu, fasilidade, treinamentu militár no meiu seluk.
“Liuhosi ami-nia enkontru ne’e nia iha kompromisiu katak sei kontinua kooperasaun ne’ebé iha ona liuhosi formasaun ba rekursu umanu, apoia ita iha ekipamentu no meiu sira inklui treinamentu militár sira”, Tenente Jenerál, Domingos Raul dehan iha Kuartel Jenerál F-FDTL Fatuhada.
Falur apresia Portugal nu’udar amigu di’ak ba Timor-Leste hodi ajuda no dezenvolve ona Komponente Navál liuhosi apoia ró rua Jaco no Betano.
“Ohin Portugal kontinua hato’o prontidaun hodi apoia ita liuhosi kooperasaun ne’ebé iha ona”, nia konklui.
Jornalista: Natalino Costa
Editór : Zezito Silva
