DILI, 02 janeiru 2024 (TATOLI) – Ministériu Agrikultura, Pekuária, Peska no Floresta (MAPPF) prevee, iha tinan ne’e, rihun $200 ba akizisaun fini batar tonelada 80 hodi distribui ba grupu agrikultór sira iha munisípiu.
Diretór-Jerál Agrikultura, Martinho Laurentino Soares, hatete, kada tinan, MAPPF sempre prevee orsamentu atu sosa fini sira, tanba ida ne’e tama ona iha planu anuál nian, hodi fahe ba to’os-na’in sira kuda iha rai potensiál.
Iha tinan kotuk, ministériu sosa ona fini batar tonelada 118 ho orsamentu rihun $300 no fahe ona ba agrikulór sira iha kada munisípiu, nune’e bele hasa’e produsaun batar iha rai-laran. Aleinde ne’e, iha 2022, ministériu distribui batar tonelada hamutuk 140.
“Fini sira ne’e distribui fazeadamente ba grupu agrikultór sira iha kada munisípiu. Ne’e duni faze dahuluk distribui tonelada 74 no daruak kontinua distribui tonelada 44”, nia hatete iha Comoro.
Dirijente ne’e esplika katak MAPPF halo kooperasaun ho grupu asosiasaun lokál ka Asosiasaun Nasionál Produtór Fini Komersiál Timor-Leste (ANAPROFIKO-TL) sira hamutuk 60-resin hodi prodús fini, nune’e ministériu sosa fali hodi fahe ba agrikultór sira iha munisípiu.
Asosiasaun ne’e estabelese iha 2015 ne’ebé daudaun ninia ramu iha hotu territóriu nasionál. Asosiasaun nia ezisténsia atu hapara fini esportasaun, tanba desde tinan 2015 Governu sosa fini ho kuantidade boot hosi rai-li’ur, maibé ho ezisténsia asosiasaun nian, bele redús ona fini importasaun.
Jornalista: Tomé Amado
Editora: Maria Auxiliadora
