DILI, 20 fevereiru 2024 (TATOLI)—Iha loron 31 marsu, Autoridade Munisípiu Dili (AMD) hapara kontratu ba empreza lokál sira ne’ebé mak durante ne’e ra’ut lixu iha Dili laran, Diretór Servisu Munisipál Água, Saneamentu no Ambiente, AMD, Domingos Godinho, informa.
“Durante ne’e ita kontratu ho empreza lokál sira no karreta kamioneta hamutuk 50 mak ra’ut lixu iha Munisípiu Dili, agora orsamentu ne’ebé mak AMD tau ba empreza lokál sira ra’ut lixu hamutuk $541.613, entaun iha 31 marsu tinan ne’e ita sei hapara kontratu ho empreza sira ne’e, tanba tuir ita-nia planu iha loron 1 fulan abril ita-nia ekipamentu modernu rezíduo sólidu urbana mak sei halo fali operasaun ba koleksaun ka foti lixu sira iha Dili laran,” Domingos Godinho informa ba TATOLI iha nia kna’ar fatin Matadouru, Dili, foin lalais ne’e.
Domingos dehan, oras ne’e daudaun ekipa sira halo hela fatin lixu iha kada bairru sira ne’ebé mak lixeiru sira iha ba, tanba ekipamentu modernu sira mai ona ho nune’e iha meadu marsu ekipa sira halo ona instalasaun no iha fulan abríl hahú halo ona operasaun.
“Iha meadu fulan marsu ami halo instalasaun ba fatin sira iha Dili laran, depois iha abril ita halo ona operasaun husi ekipmamentu modernu sira,” nia hateten.
Ezekutivu ne’e relata, se bainhira rezíduo seidauk implementa iha abril entaun AMD sei extende kontratu tan ba karreta kaminiota 50 atu nune’e sira kontinua ra’ut lixu hodi hein prosesu sira tuirmai.
“Tuir planu katak ekipa sira atu halo rezíduo hamutuk 1000-resin iha munisípiu Dili, maibé husi ne’e ekipa sira halo hotu ona fatin ne’e hamutuk 300 resin, la inklui ho Postu administrativu Metinaro,” nia informa.
Diretór Servisu Munisipál Água, Saneamentu no Ambiente, AMD, Domingos Godinho, esplika, ekipamentu modernu ne’e la hanesan ho manuál ne’ebé mak agora daudaun iha, tanba ekipamentu ne’e otomátiku.
“Bainhira ita utiliza ekipamentu modernu ra’ut lixu hanesan baibain maibé depois to’o iha Tibar mak foin fahe lixu hanesan plástiku karik tau ketak, ai-tahan tau ketak. Ida ne’e mak ita sei halo iha tempu tuir mai,” nia subliña.
Diretór ne’e afirma, ekipamentu sira ne’e AMD sei halo faze inspensaun, depois faze inspesaun entrega ba empreza Xina Harbour no empreza lokál PAX hodi hahú instala fatin lixu hirak ne’e.
Entertantu, empreza ne’ebé sai vensedór hodi sosa ekipamentu mak China Nuclear CN22.
Ekipamentu sira ne’e mak hanesan ekipamentu kolesaun no transportasaun ra’ut lixu nian no mós fatin lixu nian ne’ebé mak ho medida oioin hanesan, ekipamentu kolesaun no transportasaun ra’ut lixu nian.
Depois fatin lixu ne’e rasik ho nia medida oioin inklui ekipamentu pezadu sira hanesan Pundoxa ho Eksa no mós ekipamentu ba roda tolu ne’ebé mak sei utiliza tama sai bairru sira iha Dili.
Husi ekipamentu sira ne’e hanesan roda tolu hamutuk 10, fatin lixu hamutuk rihun ida, kompostu husi 1.1 litru 2.4 litru depois 1.1 metro kubiku, 8 metro kubiku no 20 metru kubiku.
Jornalista : Felicidade Ximenes
Editór: Rafael Ximenes de A. Belo
