OÉ-CUSSE, 24 fevereiru 2024 (TATOLI)–Sekretáriu Estadu Formasaun Profisionál no Empregu (SEFOPE), sabadu ne’e, halo abertura teste eskrita ba kandidatu traballadór Austrália hamutuk na’in-992 liuhosi Programa Pacific Austrália Labour Mobility (PALM, sigla inglês) iha Rejiaun Administrativa Espesiál Oé-Cusse Ambeno (RAEOA).
Notísia Relevante: SEFOPE sei fó sai rezultadu balu ba aplikante 55.436 iha tempu badak
Sekretáriu Estadu Formasaun Profisionál no Empregu (SEFOPE), Rogério Araujo Mendonça, hateten, SEFOPE hili Oé-Cusse sai projetu pilotu tanba númeru rejista iha vaga online hamutuk 5000, RAEOA hetan de’it 992 no inklui sira-ne’ebé servisu iha rai-li’ur kiik-liu hamutuk 658.
“Governu liuhosi SEFOPE fó prioridade liu ba Oé-Cusse, ne’e mak ohin ita mai halo abertura iha ne’e. Hein katak, sira 992 ne’e maioria aprovadu iha vaga online ida-ne’e, tanba abertura ohin ne’e inklui munisipíu 13 iha territóriu nasionál,” Rogério Araujo Mendonça hateetn iha nia diskursu iha otél Ambeno.
Governante ne’e husu autoridade lokál no juventude sira atu kontinua partilla infromasaun hosi nivél postu to’o suku no aldeia, tanba balun ladún asesu informasaun no balun lakohi duni atu partisipa iha Programa Pacific Austrália Labour Mobility (PALM) ne’e.
Prosesu teste ida-ne’e la’o ho transparénsia, laiha intensaun polítika ida katak hosi kór partidu ida, etnia, rasa no relijiaun maibé prioridade liu ba sidadaun timoroan hotu-hotu.
“Se informasaun mosu dehan, iha polítika, iha prosesu teste ne’e, imi bele levanta ba iha autoridade kompetente sira, hodi prosesa ema sira-ne’ebé mak sai komisaun iha ezame ne’e. Maibé ami fó prioridade liu ba Oé-Cusse, hodi hetan kuota ida-ne’ebé boot mak Oé-Cusse, tan ne’e ohin mai lansa iha ne’e,” nia apela.
Abertura kursu lian Inglés-Korea
Entretantu, Sekretária Estadu Formasaun Profisionál no Empregu (SEFOPE) halo mós abertura ba kursu lian Inglês no lian Korea iha Rejiaun Administrativa Espesiál Oé-Cusse Ambeno (RAEOA).
Notísia relevante: SEFOPE sei desentraliza formasaun lian ingles no korea iha Oé-Cusse
Sekretáriu Estadu Formasaun Profisionál no Empregu (SEFOPE), Rogério Araujo Mendença, hateten durante ne’e SEFOPE sentraliza liu formasaun sira iha nasionál, tan ne’e liuhosi polítika IX Governu Konstitusionál ne’e deside loke tan iha munisipíu atu fasilita formasaun ba joven sira.
Governante ne’e fó ezemplu, se ema na’in-992 hosi Oé-Cusse ba tuir formasaun iha Díli, hosi ne’e persiza lori osan barak hodi uza ba nesesidade loro-loron, liuliu hela ho família, balun aluga uma entaun sei la garante sira-nia atendimentu durante iha kapitál.
“Entaun ho polítika Governu nian, lori formasaun ne’e mai iha ita-bo’ot sira nia fatin, nune’e ita-boot sira bele asesu. Agora saida mak husu ita-boot sira-nia apoia, apela ba joven sira uza oportunidade ne’e ho didi’ak,” Rogério Araujo Mendença hateten.
Nia esplika, objetivu hodi dezentralizasaun kursu ne’e, primeiru, SEFOPE tenke garante formasaun ne’ebé mak kualidade hodi responde ba merkadu rai-laran no rai-li’ur, nune’e tuir mai polítika Governu nian hodi bele kria kampu de traballu atu redús taxa dezempregu iha rai-laran,
“Entaun ita kria empregu ne’e la’os de’it empregu ba li’ur maibé ba rai laran mós, ida-ne’e mak intensaun hosi formasaun ne’e,” nia dehan.
Prezidente Autoridade RAEOA, Rogério Tiago Lobato, hateten iha tempu badak persiza selebra Memorandum Entendimentu (MoU), hodi bele haforsa liután kooperasaun entre SEFOPE ho RAEOA.
“Iha tempu badak ami sei asina MoU ida, para halo ligasaun entre SEFOPE sentrál RAEOA metin liután, ita labele mai rejionaliza de’it. Bainhira ita laiha kapasidade no kompeténsia, primeiru tenke kria kapasidade, kuandu kapasidade iha ona mak ita rejionaliza,” nia dehan.
Aleinde ne’e, Pnia apresia ba programa ne’ebé SEFOPE organiza, tanba kria alternativa ba ema-ne’ebé la hetan servisu iha Estadu sira-bele servisu iha rai-li’ur atu hadi’a sira-nia moris.
“Ha’u husu de’it kandidatu sira atu kontinua aprende ho fuan no domin. Presiza halo sakrifisíu, tanba atu hetan susesu liuhosi prosesu ida. Imi agora atu ba Australia tenke aprende lian inglês, tanba dadus SEFOPE nian hatudu Oé-Cusse númeru kiik-liu asesu servisu ba rai-li’ur. Ita tenke muda situasaun ida-ne’e,” nia dehan.
Tanba ne’e, nia apela ba kandidatu sira katak bainhira hetan susesu sai traballadór iha nasaun seluk, persiza aprende no uza direitu ne’ebé iha hodi hadi’a imi-nia moris no bele sustenta família.
“Agora, ha’u dehan ba imi. Imi ba ne’ebá la’os manán osan de’it maibé imi ba ne’ebá tenke aprende buat barak, dixipliña traballu, pontualidade, aprende moris hamutuk uza osan ne’ebé imi manán hadi’a no muda nesesidade uma no família,” nia fó hanoin.
Entreteantu, prosesu teste ne’e hala’o durante loron rua no hetan observasaun másimu hosi ekipa embaixadór Austrália ba Timor-Leste, Departementu of Foreign Affairs and Trade (DFAT, sigla inglês), no Agêncy Intenasionál Pasicik Labour Facility (PLF, sigla portugés).
Notísia Relevante: Janeiru 2024, SEFOPE sei lansa programa pilotu akompañamentu família
Jornalista : Abílio Elo Nini
Editór : Cancio Ximeens
