DILI, 12 dezembru 2023 (TATOLI)–Sekretaria Estadu Formasaun Profisionál no Empregu (SEFOPE), tersa ne’e, halo abertura programa pilotu ‘akompañamentu família’ ne’ebé sei lansa iha janeiru 2024.
Sekretáriu Estadu Formasaun Profisionál no Empregu, Rogério Araújo Mendonça, hateten, programa ne’e importante tebes tanba bele disamina ba traballadór sira ne’ebé atu bá serbisu iha Austrália ho durasaun tinan naruk karik sira bele lori família ba akompaña sira.
“Ita hotu hatene traballadór uluk ne’e bá serbisu durasaun fulan-neen to’o fulan-sia de’it, maibé agora mudansa sira bele ba serbisu ho durasaun naruk hanesan tinan-haat ba leten tanba tama ona programa ida naran semi-skilled ka Pacific Australia Labour Mobility (PALM), entaun liuhosi programa pilotu akompañamentu família ne’e sira bele lori sira-nia família bá hotu bainhira empreza sira ne’ebé atu simu sira serbisu ne’e hatan, nune’e antes sira bá, ita tenke fó uluk informasaun ba sira,” Rogério Araújo, informa iha salaun Excelsior Resort, Praia dos Coqueiros.
Notísia relevante : SEFOPE klarifika teste kandidatu traballadór timoroan bá servisu iha Austrália
SEFOPE liuhosi Diresaun Nasionál Empregu no Exteriór (DNEE) ho kolaborasaun hosi Governu Austrália inisia programa ne’e.
Governu Austrália komprometidu atu permite traballadór hamutuk na’in-200 hosi eskema PALM ho durasaun longu-prazu, ne’ebé fó oportunidade atu lori sira-nia família tama bá Austrália ho konkordánsia empregadór.
Aplikasaun sei loke iha janeiru 2024, to’o 100 hosi nasaun rua Kiribati no Timor-Leste sei hetan selesaun atu tama bá Austrália. Prosesu daruak ba selesaun, restu família sira-seluk sei hala’o iha fulan ikus tinan 2024, no família hosi nasaun sira seluk iha eskema PALM bele elíjivel atu partisipa iha ronde daruak.
Kritériu elejibilidade atu tama bá Austrália mak hanesan, família imediata hanesan feen, laen ka parseiru faktu no labarik dependente. Aleinde ne’e, sira mós tenke iha abilidade ko’alia lian inglés báziku. Enkuantu, ba kritériu rekerimentu ba vistu, membru família hotu presiza atu kumpre rekerimentu ba vistu Austrália.
Iha fatin hanesan, Primeiru Sekretária Embaixada Austrália iha Timor-Leste, Peny Robert, hateten, Governu Austrália apresia ba programa ne’e tanba bele hatan dezafiu ruma hosi esperénsia família no traballadór sira.
Governu Austrália nota katak pilotu ida-ne’e la’os fó benefísiu ba Governu de’it maibé ba mós emprezáriu no komunidade hotu iha Austrália.
“Programa pilotu ida-ne’e iha nia vantajen no desvantajen, tanba ne’e importante tebes ami bele enkoraja família sira atu tuir sesaun ida-ne’e ho di’ak hodi rona no hatene. Vantajen mak ita hetan osan no bele lori família bá maibé nia desvantajen mak iha Austrália hela fatin, hahán no buat hotu ho osan, nune’e molok atu bá tenke hatene uluk informasaun liuhosi programa pilotu akompañamentu família,” nia tenik.
Jornalista : Arminda Fonseca
Editora : Julia Chatarina
