DILI, 04 marsu 2024 (TATOLI)—Sekretáriu Estadu Formasaun Profisionál no Empregu (SEFOPE), Rogério Araújo Mendonça, klarifika ba públiku katak traballadór timor-oan ne’ebé antes ne’e serbisu iha Austrália no Koreia Súl, hetan tan oportunidade serbisu (re-entry) tanba prestasaun serbisu di’ak.
“Atu hateten de’it sira ne’ebé re-entry, signifika katak sira-nia komportamentu no prestasaun serbisu di’ak. Tanba ida-ne’e mak kompañia bolu filafali sira hodi bá serbisu,” Sekretáriu Estadu Rogério, hato’o liuhosi konferénsia imprensa, iha salaun SEFOPE, Caicoli, segunda ne’e.
Governante dehan, SEFOPE durante ne’e foti traballadór re-entry sai hanesan ezemplu ba traballadór foun sira ne’ebé mak atu bá serbisu iha Austrália no Koreia.
“Ne’ebé atu hateten de’it, re-entry katak traballadór sira ne’ebé komportamentu di’ak, maibé ha’u bele konsidera katak númeru ne’e ki’ik, enkuantu traballadór foun númeru boot, entaun traballadór sira re-entry ami sempre uza sira nu’udar ezemplu ba traballadór foun molok sira arranka bá serbisu iha rai-li’ur, katak tenke banati tuir traballadór ne’ebé mak re-entry tanba sira hatudu ona prestasaun serbisu di’ak iha kompañia,” Rogério tenik.
Sekretáriu Estadu apela mós ba públiku atu labele fiar informasaun ne’ebé espalla hosi ema irresponsável, katak Governu lafó ona oportunidade serbisu ba sira ne’ebé re-entry.
Traballadór re-entry iha Koreia Súl daudaun ne’e hamutuk 1.000 resin, no Austrália 3.000 resin.
Jornalista : Antónia Gusmão
Editora : Julia Chatarina
