OÉ-CUSSE, 08 marsu 2024 (TATOLI) – Iha trimestre dahuluk hosi janeiru to’o marsu, Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, ezekuta ona Orsamentu Jerál Estadu (OJE) 2024 nian ho pursentu 4% maioria paga ba saláriu no vensimentu.
“Ezekusaun ida ikusliu ne’e, ha’u haree to’o ona 4%, ne’e ba saláriu vensimentu,” Sekretária Finansa RAEOA, Elvira de Carvalho Manat, relata iha ámbitu enkontru kortejia ho Vise-Ministra Finança, iha salaun autoridade Oé-Cusse, sesta ne’e.
Notísia relevante: PN aprova millaun $60 ba RAEOA
Membru Autoridade ne’e, la esplika detalla kona-bá hosi 4% ekivalente ba orsamentu hira nian, maibé rekoñese, ezekusaun OJE 2024 hosi RAEOA hamutuk millaun $60, tarde no la’o neneik liu, tanba estrutura Autoridade RAEOA foin simu pose iha fulan fevereiru no servisu balun foin maka atu hala’o.
“Ezekusaun orsamentu agora la’o daudaun ona, maske la’o neineik, maibé ami konsege la’o ona, hanesan ita hotu hatene, ezekusaun primeiru ami halo ba pagamentu saláriu, ne’ebé maka la ezekuta hosi janeiru, to’o fevereiru maibé ami finaliza ona,” nia katak.
Nia informa, kona-bá projetu sira-ne’ebé ezekuta ona iha adminitrasaun sesante, daudaun ne’e Autoridade RAEOA sei koorena ekipa Ajénsia Dezenvolvimentu Nasionál, Institutu Públiku (ADN, I.P), hamutuk ho Diresaun Rejionál Infraestrutura (DRI) Oé-Cusse, hodi halo verifikasaun, nune’e bele aselera pagamentu.
Vice-Ministra Finansa, Felícia Claudinanda Cruz Carvalho, informa, objetivu vizita ne’e atu mai hasoru Prezidente Autoridade RAEOA, ko’alia kona-bá programa Governu nian no ezekusaun Orsamentu Jerál Estadu (OJE) 2024 nian iha Oé-Cusse.
“Tanba ita foin inísiu iha primeiru trismestre, ne’ebé oinsá atu haree kona-bá relatóriu no programa ne’ebé hala’o no kontinuasaun, ita foin inísiu 2024 nian, no Autoridade RAEOA mós foin eleitu fulan ida, ezekusaun di’ak, tanba iha OJE 2024 nian, ne’ebé ita la’o tiha lai, depois mak haree nia dezenpeñu orsamentu nian,” nia katak.
Notísia relevante:Autoridade sei rekruta funsionáriu 44 hodi haforsa servisu finansa Oé-Cusse
Parlamentu Nasionál (PN), aprova OJE 2024 ho montante millaun $60, fahe ba rua, millaun $40 ba RAEOA no millaun $20 ba Fundu Espesiál Dezenvolvimentu (FED).
Hosi millaun $40 ne’e, hodi koloka ba saláriu vensimentu $14.351.592, bens no servisu $11.090.833, transferénsia públika $4.307.575, kapitál menór rihun $350, kapitál dezenvolvimentu $9.900.
Orsamentu ne’e, aloka ba programa dezenvolvimentu rurál no urbana $194.567, programa seguransa nasionál $25.500, programa asesu justisa $1.116.100, programa funsionamentu no dezenvolvimentu institusionál $21.277.705, programa ensinu báziku $1.069.320.
Programa saúde $681.063, programa dezenvolvimentu no reforsu zona ho tratamentu administrativu no ekonómiku espesiál $14.346.975, programa edukasaun no formasaun $913,114, programa inkluzaun sosiál $96.878, programa turizmu $63.309.
Programa investimentu no diversifikasaun ekonomia $68.969, programa jestaun sustentável rekursu naturál, utilizasaun no konservasaun $17.500, programa aumentu sustentável produtividade no produsaun $129.000.
Fundu Espesiál Dezenvolvimentu
Parlamentu Nasionál mós FED ba RAEOA hamutuk millaun $20 hosi millaun $60 hodi koloka ba saláriu no vensimentu $598.198, bens no servisu $9.930.614, transferénsia públika $2.871.110 no kapitál dezenvolvimentu $6.600.002.
Hosi orsamentu ne’e aloka ba programa estrada no ponte $6.600.002, programa bolsa estudu $108.503. programa tipu formasaun sira seluk $135.004, programa funsionamentu no dezenvolvimentu institusionál $810.962.
Programa eletrisidade, $5.912.440, programa aeroportu $3.933.082, programa dezenvolvimentu no reforsu zona ho tratamentu administrativu no ekonómiku espesiál $2.500.007.
Notísia relevante: Orsamentu millaun $60 ba RAEOA la sufisiente atu finansia projetu kontinuasaun iha 2024
Jornalista: Abílio Elo Nini
Editór: Evaristo Soares Martins
