OEKUSI, 19 Maiu 2026 (TATOLI) – Funsionáriu kazuál hamutuk ema na’in-47, ne’ebé antes ne’e serbisu iha Diresaun Rejionál Juventude no Desportu Rejiaun Administrativa Espesiál Oekusi Ambenu(RAEOA), seidauk simu sira-nia salariu fulan tolu, hahú husi fulan-Janeiru mai to’o fulan Marsu 2026 ne’e.
Notísia relevante:Posibilidade, Kontratu Funsionáriu 1.500-resin iha RAEOA sei “hapara”
Portavós, Martinho do Carmo Neno, hateten, funsionáriu na’in-47 ne’e, ho saláriu diferente balun $272 no balun 204, no daudaun ne’e la ativa ona, tanba Governu halakon ona Diresaun Rejionál Juventude no Desportu.
“Ami na’in-47, la ativa ona, maibé ami-nia saláriu fulan tolu seidauk simu, husi Janeiru mai to’o Marsu, maske ita iha kontratu, asina direita husi Prezidente Autoridade, saláriu sira-ne’e mós lahanesan balun $272.00 no balnu $204.00, ne’e tuir ona tabela funsaun públika,” portavós ne’e informa ba Ajénsia Tatoli,I.P iha Oekusi, ohin.
Nia hateten, preokupasaun ne’e, funsionáriu sira hato’o direita ona ba iha Prezidente Autoridade RAEOA Régio da Cruz Salu, atu konsidera tanba presta ona serbisu ba Estadu.
“Iha semana kotuk, ami hala’o ona audénsia ho Prezidente Autoridade, nia garante ona mai ami katak sei rezolve maibé presiza fó tempu uitoan, atu buka meiu oinsá, nune’e bele rezolve. Tanba nomeasaun estrutura foun daudaun ne’e, ami-nia Diresaun Juventude no Desportu lakon ona, maibé ami husu de’it ami-nia direitu fulan tolu ne’e,” nia hateten
Notísia relevante:PA RAEOA sei halo ezersísiu ba OJE 2026 molok rekruta funsionáriu kazuál
Hatan ba asuntu ne’e, Prezidente Autoridade RAEOA Régio da Cruz Salu, rekoñese, no promete sei rezolve tanba ne’e nu’udar divída ba Autoridade RAEOA.
“Ne’e divídas ba ita. Antes ne’e delegasaun ida mai hateten, ha’u hatuun ona despaisu ida iha loron 08 Maiu ba Sekretária Rejionál Rekursu Umanu no Administrasaun Finansa atu haree no fó paresér mai ha’u. Ha’u fiar semana oin ha’u sei hetan karta paresér ne’e atu haree nia solusaun ne’e oinsá, maibé Governu deklara ona, divídas sira-ne’e iha prova, legalmente, tenki fó solusaun legál,” nia hateten.
Notísia relevante:Atividade tolu iha administrasaun Oekusi paradu, hafoin funsionáriu 60 notifikadu
Jornalista: Abílio Elo Nini
Editór: Rafael Ximenes de A. Belo
