DILI, 18 abríl 2024 (TATOLI)—Ministériu Edukasaun liuhosi Dirasaun Ensinu Sekundáriu Jerál, semana kotuk ne’e, submete ona diploma ministeriál kona-ba uniforme eskolár nian ba Prezidénsia Konsellu Ministru (PCM, sigla portugés).
Notísia Relevante: ME prepara diploma ministeriál ba uniforme hodi labele hatodan inan-aman
“Iha semana kotuk ami konfirma ona ho gabinete apoiu jurídiku katak ezbosu diploma ne’e ba ona Prezidénsia Konsellu Ministru. Diploma ne’e parte PCM sei halo diskusaun depois bainhira la nesesita ona halo revizaun ruma mak PCM sei re-enkamiña karta mai Ministériu Edukasaun no ministra aprova mak ita implementa,” Diretór Jerál Ensinu Sekundáriu Jerál, Deolindo da Crus, Diretór Jerál hateten ba Agência Tatoli, iha nia kna’ar fatin, Vila Verde, segunda ne’e.
Ezbosu diploma ministeriál ne’e elabora hosi Dirasaun Ensinu Sekundáriu Jerál no Ensinu Tékniku Vokasionál nian hamutuk ho Dirasaun Jerál ba Pre-Rskolár, Ensinu Báziku no Ensinu Rekorrente, hodi koordena hela ho gabinete apoiu jurídiku nian.
“Rezultadu ne’e finaliza ona. Ita hein de’it desizaun kona-ba rezultadu uniforme hosi PCM,” nia hateten.
Tuir nia, uniforme ne’e presiza halo diskusaun ne’ebé kle’an kona-ba ninia modelu, kór, gravata, ne’e uza oinsá, presiza hatene pre-eskolár hanesan ne’ebé inklui ensinu báziku primeiru-segundu no terseiru siklu no ensinu sekundáriu jerál, tékniku vokasionál ho ensinu rekorrente nian.
“Iha diploma ne’e sei iha tipu rua mak hatais ba eskola nian no prátika tékniku hanesan roupa makaku (uniforme) ne’e ba prátika ijiéne no seguransa nian. Aleinde ne’e, prátika ba kursu tein nian mós. Ida-ne’e ita deside la fasil no presiza haree mós nia kustu, nune’e bele asesu lalais ba merkadu. Diploma ministeriál ne’e, iha PCM kuandu aprova mak ita sei aneksa ho kór no modelu, tipu hira, suku oinsá, inklui kustu,” nia dehan.
Kona-ba uniforme eskolár, tuir sirkulár Ministériu Edukasaun nian fó sai iha tinan kotuk katak nia mekanizmu no regra sira-ne’e sei sai hosi diploma ida, iha artigu 14, bazea ba dekretu-lei númeru 32, 33, 34, ho rejime juridiku sistema nasionál edukativu nian.
Ida-ne’e tenke ho nia diploma ministeriál ida liuliu ba mekanizmu uzu, modelu, kór no kustu, atu nune’e labele prejudika tan inan-aman sira.
Notísia Relevante: Implementasaun uniforme eskolár adia ba tinan oin
Jornalista : Osória Marques
Editór : Cancio Ximenes
