DILI, 21 marsu 2024 (TATOLI)–Diretora Nasionál Edukasaun no Promosaun iha Ministériu Saúde (MS), Emilia de Jesus Mendonça, hateten MS distribui aimoruk Albendazole ba estudante hamutuk 320.272 iha eskola ensinu báziku sentrál 1340 iha munisípiu 12 inklui RAEOA atu kombate lumbringa.
Notísia Relevante: MS-parseiru lansa projetu “dehan lae ba 5S” hadi’ak saúde no nutrisaun ba labarik
Emilia de Jesus Mendonça eplika, programa rutina MS nian ne’ebé iha tinan-tinan sempre fahe aimoruk Albendazole, maibé iha tempu propagasaun COVID-19 ne´e programa ne´e konsege para tanba MS foka liu resposta ba iha surtu ne’e.
“Programa ita fahe Albendazole ba ita-nia oan sira idade neen to’o 14. Totál estudante hamutuk 320.272 iha munisipiu hotu,” nia hateten ba Agencia Tatoli, iha Caicoli, kinta ne´e.
Responsável ne’e garante, MS fahe aimoruk Albendazole ba estudante sira no kada alunu hemu musan ida iha fatin distribuisaun.
Nia husu ba labarik sira-ne’ebé lafrekuente iha ensinu báziku atu hakbesik aan ba iha fasilidade saúde hodi simu Albendazole.
Diretora ne’e hateten, distribuisaun sei hala’o ba dalarua kada tinan no daudaun ne’e distribui ba iha primeira etapa ne’ebé termina iha fulan-abril nia rohan no segunda etapa sei la´o iha fulan agostu 2024.
Objetivu labarik sira hemu aimoruk Albendazol bele hetan reasaun, maibé profisionál saúde bele atende maibé ida ne’e akontese raru.
Funsaun hosi aimoruk Albendazole atu minimiza kontaminasaun lumbringa husi rai, tanba labarik sira gosta halimar rai.
“Tamba ita-nia oan sira ho idade kiik, maioria sira gosta halimar rai rahun no kaer foer, haluha la fase liman. Dalaruma ba kazadebañu, fila mai la fase liman no kaer hahan hodi han, entaun lumbringa dezenvolve iha isin. Ida-ne’e mak ita fó ida-ne’e hodi redús ka evita labraik sira husi lumbringa,” nia dehan.
Tuir nia, labarik sira-ne’ebé hetan lumbringa iha isin, laiha saudável atu ba atividade aprendizajen, tanba ne’e mak presiza aimoruk Albendazól, aleinde programa merenda eskolár.
Programa inklui ba iha Pakote Kuidadu Saude Primaria nakait ho Projetu Say No to 5S signifika kona-ba Hamlaha, Lumbriga ne’ebé da’et husi rai, Moras kulit, Fuma, no Bebidas midar/alkóliku iha Timor-Leste.
Projetu ne’e hetan finansiamentu husi KOICA ho montante millaun $7.8.
Notísia Relevante: Kombate lumbringa: Servisu Saúde Ainaro distribui aimoruk albendazole ba eskola 13
Jornalista : Jesuína Xavier
Editór : Cancio Ximenes
