BOBONARO, 05 abril 2024 (TATOLI)-Prezidente Autoridade Munisipál (PAM) Bobonaro, Alexandrino Pires, dúvida ho kualidade rai-henek neʼebé empreza internasionál PT Hutama Karya utiliza ba projetu dreinajen iha estrada Urbana Maliana Vila hosi diresaun Soso ba to’o Tunubibi, suku Tapo-Memo, postu administrativu Maliana.
Alexandrino Pires, hateten iha semana kotuk liubá nia parte halo observasaun direita iha terrenu identifika katak rai-henek neʼebé kompañia uza la kualidade tanba ra’ut de’it iha mota-Soso neʼebé nakonu ho tahu.
Notísia relevante: Empreza Hutama Karya hahú reabilita estrada Maliana
“Ba ha’u, dreinajen ba Tunubibi, ha’u triste to’o ha’u tanis, tanba kompañia internasionál ida foti rai-henek hanesan ne’e, matenek hatene katak ita-nia mak Batugade ho Cailaco, maibé sira mai kontinua nafatin ra’ut rai-henek iha Soso ne’ebá, ha’u bolu sira dada to’o mota-laran katak rai-henek ne’e foti iha-ne’e, ha’u hateten o matenek foti rai-henek ida hanesan ne’e, durasaun tinan hira,” nia ko’alia iha EBC Raifun, sesta ne’e.
Nia parte orienta kompañia hapara provizóriu obra ne’e ho objetivu atu utiliza fali rai-henek iha Batugade no Cailaco, tanba tuir estudu hosi Ajénsia Dezenvolvimentu Nasionál (ADN) rai-henek iha fatin rua ne’e mak moos no kualidade di’ak.
Nia subliña, asaun referida laiha rezultadu tanba deskonfia iha individu balu mak apoia empreza hodi kontinua implementa projetu ne’e.
“Ha’u hatete para, maibé iha ema matenke barak nasionál halimar sasan sira-ne’e iha laran, joga tún sa’e lori apoia nafatin ba kompañia atu sira hetan osan, ha’u dehan imi bele foti osan ba, mas rai hela sasán di’ak ba ha’u ho povu ida-ne’e,” nia tenik.
Alexandre argumenta, foin lalais ne’e ekipa tékniku hosi Mininstériu Obra Públika sampel rai-henek Soso hodi ba halo teste fila-fali iha laboratóriu.
“Haree lai rai-henek iha Soso ne’e tama ka lae, se nia la tama, ha’u haruka para, la’ós osan ba ha’u, maibé ha’u defende nafatin povu ida-ne’e. Sira terus beibeik ona, ha’u-nia povu presiza atu estrada di’ak, bee labele sa’e sira-nia uma, labele lori beibeik lixu mai tau iha povu ida-ne’e, sira susar ona estrada ladi’ak, halo estrada imi ba foti osan barak, lori hotu sasán di’ak sai hosi Bobonaro, rai hela sasán ladi’ak ba ami,” nia hateten.
Realsiona ho kestaun ne’e iha semana kotuk liubá jornalista sira, tenta halo komfirmasaun ho parte reponsável PT Hutarma Karya iha edifísiu suku Odmau, maibé la fó komentariu.
Alberto Pereira nu’udar abitante lokál, konkorda ho desizaun Prezidente Autoridade Munísipiu Bobonaro, tanba hakarak obra refere hatudu kualidade di’ak.
“Ami durante ne’e akompaña projetu kiik ka boot la’o iha it- nia munisipiu ne’e, rai-henek Soso ema la uza ida, tanba tahu, fo’er mak barak, ema bainbain uza mak iha Cailaco, ne’e mak ADN sira dehan kualidade di’ak, mas ita lahatene kompañia ne’e mai foti fali iha Soso, sira halo teste halo nusá mak dehan, ikus sira uza ne’e karik. Ida-ne’e ami mós sente dúvida, obra ne’e iha kualidade ka lae,” nia katak.
Tuir observasaun Ajénsia Tatoli iha terrenu nota katak, rai-henek refere empreza fakar ona hahú iha Soso to’o parte Tunubibi no projetu ne’e hahú implementa ona iha parte área Cabang-Memo diresaun ba Tunubibi.
Enkuantu projetu ne’e nu’udar faze dahuluk molok konstrui estrada urbana Maliana Vila hosi diresaun Soso ba to’o ponte Nunura ho distánsia kilometru sia no projetu ne’e sei gasta orsamentu $21,228.762.00 ho durasaun kontratu tinan ida fulan-neen.
Notísia relevante: Komunidade husu Governu tau-matan ba estrada Maliana-Bobonaro
Jornalista: Sérgio da Cruz
Editór: Evaristo Soares Martins
