DILI, 08 abríl 2023 (TATOLI)—Reprezentante Espesiál Austrália ba Greater Sunrise, Esteve Bracks, hasoru malu hikas ho Primeiru-Ministru (PM), Kay Rala Xanana Gusmão, hodi atualiza progresu dezenvolvimentu Greater Sunrise.
Esteve Bracks haktuir, Governu Timor-Leste no Austrália kontrata ona Empreza Wood Austrália ne’ebé ninia edifísiu iha Londres, hodi halo estudu ba konseitu ekonómiku, ne’ebé tuir planu sei konklui iha tinan ne’e. Estudu ne’e hala’o tiha ona iha semana kotuk.
“Enkontru ho Primeiru-Ministru Xanana Gusmão no Ministru Petróleu no Rekursu Minerál ne’e pozitivu tebes. Tanba ami halo diskusaun kona-ba Greater Sunrise no oinsá dezenvolve iha futuru. Ami hili no kontrata ona empreza ida hodi halo estudu ba konseitu ekonómiku ba projetu Greater Sunrise no rezultadu estudu ne’e sei sai iha tinan-ne’e,” Esteve Bracks hateten hafoin enkontru ho PM Xanana Gusmão, iha Palásiu Governu, segunda ne’e.
Notísia relevante : PM Xanana husu Woodside respeita interese parseiru ba dezenvolvimentu Greater Sunrise
Tuir Reprezentante Espesiál ne’e, husi estudu ne’e mak bele hatene loloos projetu ne’e dezenvolve iha ne’ebé no oinsá. Governu rua entuziasmu no otimista hodi hein rezultadu husi estudu ne’e.
Antes ne’e, iha novembru 2023, Esteve Bracks mai ona hasoru Xefe Governu hodi ko’alia kona-ba estudu ne’ebé daudaun halo hela no hato’o katak, Austrália prefere halo estudu viabilidade foun ba konseitu dezenvolvimentu Greater Sunrise.
Estadu Timor-Leste liuhosi Timor GAP, E.P hola parte ona iha konsórsiu Greater Sunrise, ho partisipasaun maioria reprezenta 56,56%, Woodside (operadora) 33,44% no Osaka Gas 10%.
Jornalista : Antónia Gusmão
Editora : Julia Chatarina
