DILI, 12 Abril 2024 (TATOLI) – Servisu Unidade Kuarentena no Biosseguransa sei aumenta rekursu umanu na’in-50 ne’ebé iha koñesimentu tékniku iha área importante tolu iha saúde animál, protesaun ba plantasaun no iha área peska hodi reforsa serbisu iha terrenu.
Unidade Kuarentena no Biosseguransa daudaun iha funsionáriu hamutuk 171, husi númeru ne’e na’in-121 kategoria ajente administrasaun no 50 maka nu’udar inspetór iha área espesífika sira. Tanba ne’e, Diretór Unidade Kuarentena no Biosseguransa, Manuel da Costa, hakarak rekruta tan, iha tinan ne’e, funsionáriu ne’ebé estuda iha siénsia espesífika sira ne’e hodi reforsa tékniku sira ne’ebé daudaun ne’e iha.
“Hakarak atu aumenta tan rekursu umanu ba área tolu ne’e, tanba sira ne’e mak komprende área importante ne’e bainhira mosu kazu ruma ne’ebé espesífiku”, Manuel da Costa dehan iha Aeroportu Internasionál Nicolau Lobato, Comoro.
Nia salienta katak ba funsionáriu ajente administrasaun sira ne’ebé daudaun iha ne’e agora destaka hotu iha kada sentru ne’ebé instala iha munisípiu sira no sira na’in-50 ne’ebé iha espesialidade iha saúde animál, plantasaun no peska nian – na’in-10 koloka iha Oé-Cusse, Maliana- Batugadé tolu, Covalima-Mota-Masin tolu no iha Aeroportu Dili iha inspetór na’in-20 tanba ema barak tama no sai husi fatin ne’e, inklui iha portu antigu na’in-haat no portu Tíbar tolu, korreiu iha na’in-tolu no postu vijilánsia sira iha Baucau no Lautém koloka kada ema na’in-rua.
“Funsionáriu na’in-121 destaka mós iha fatin sira ne’e hodi apoia serbisu Kuarentena nian hamutuk ho inspetór sira atu tau-matan ba sasán sira ne’ebé tama no sai husi Timor-Leste”, esplika.
Unidade Kuarentena no Biosseguransa hanesan diresaun ida iha Ministériu Agrikultura, Pekuária, Peska no Floresta (MAPPF) nia okos ne’ebé nia orsamentu ba tinan ida ne’e hamutuk $1,416,747 no nia ezkusaun verba iha trimestre dahuluk foin iha 6,3%.
Unidade Kuarentena no Biosseguransa iha responsabilidade regulatória atu ajuda MAPPF kontrola importasaun no esportasaun ai-horis no produtu vejetál, rasaun animál, produtu orijen husi animál, komodidade animál sira, materiál biolójiku sira no produtu veterináriu, nomós animál moris sira.
Diresaun ne’e mak resposavel ba proteje saúde rekursu agríkola nasaun no dezempeña papél fundamentál iha protesaun agrikultura no meiu ambiente país nian kontra planta invaziva sira, animál estimasan no moras sira. Aleinde ne’e, buka prevene entrada alimentu sira prejudisiál ba ema no animál iha kadeia alimentár.
Notísia relevante: Kuarentena destrui na’an importadu kilograma 36,21
Jornalista: Tomé Amado
Editora: Maria Auxiliadora
