DILI, 24 abríl 2024 (TATOLI) – Konsellu Superiór Majistratura Judisiária (KSMJ), ezonera Juiz na’in-rua tanba halo fali servisu hanesan asesór iha ministériu balun no iha RAEOA. Iha mós suspensaun Juiz na’in-ida tanba ladún presta servisu ne’ebé di’ak.
Juiz na’in-rua ne’e maka Juiz ho inisiál EX, antes ne’e servisu iha Tribunál Judisiál Primeira Instánsia Suai no AMF hala’o kna’ar iha Tribunál Judisiál Primeira Instánsia Dili.
Iha sesta (19/4) semana kotuk, Konsellu Superiór Majistratura Judisiária deside hodi ezonera Juiz nai’n-rua husi ninia funsaun.
Prezidente Tribunál Rekursu, Deolindo dos Santos, dehan Juiz na’in-rua submete pedidu mai Konsellu Superiór Majistratura Judisiária atu husu ezonerasaun ho razaun família.
“Iha duni Juiz na’in-rua ne’ebé ké Konsellu Superiór Majistratura Judisiária fó ezonerasaun ba sira tanba sira-nia pedidu no vontade rasik”, Deolindo dos Santos ba jornalista sira iha nia kna’ar fatin Caicoli, kuarta ne’e.
Deolindo esplika, iha Juiz na’in-ida mak antes ne’e hatama uluk nia pedidu mai Konsellu atu husu ezonerasaun, tanba kestaun família no iha mós Juiz ida mak hatama nia pedidu ida hodi husu lisensa sem vensimentu durante tinan lima.
Maibé Konsellu husu no buka hatene katak iha Juiz na’in-ida mak agora halo hela funsaun asesór iha ministériu balun no ida seluk husu lisensa sem vensimentu.
“Ho nune’e mak Konsellu haree no análize katak lei la fó Juiz ida husu lisensa sem vensimentu durante tinan lima, ida-ne’e bele fó impaktu ba servisu Tribunál, entaun Konsellu ezonera hosi nia funsaun”, nia informa.
Nia dehan, ezonerasaun ba Juiz na’in-rua, Tribunál enfrenta problema rekursu tanba Juiz iha 34 maibé depoisde na’in-rua hetan ezonerasaun, hela de’it 32. Hosi númeru ne’e, iha 28 mak hanesan Juiz ne’ebé servisu iha Tribunál Judisiál Primeira Instánsia no haat mak halo funsaun iha Tribunál Rekursu.
“Ita agora iha Juiz hamutuk 34, maibé iha na’in-rua mak hetan ezonerasaun, entaun ita agora iha Juiz 32, agora situasaun ne’e setór justisa hasoru difikuldade”, nia adianta.
Deolindo husu ba Governu no Parlamentu Nasionál atu halo lei ida hodi bele fó kondisaun di’ak ba Juiz sira liuhosi remunerasaun hoodi dignifika servisu Juiz sira nian.
KSMJ mós suspende Juiz ida hosi nia funsaun
Prezidente Tribunál Deolindo dos Santos, iha sesta semana kotuk liuhosi desizaun Konsellu Superiór Majistratura Judisiária deside fó pena suspensaun ba Juiza ho insiál L, ne’ebé halo nia funsaun Juiza iha Tribunal Judisiál Primeira Instánsia RAEOA.
“Konsellu mós deside hodi fó pena suspensaun ba Juiza ida tanba hanesan ema Juiza klaru katak ita-nia atitude ne’e iha kualker oras tenke hatudu karatér ne’ebé di’ak, hanesan tama servisu iha tuku 8:00 maibé durante ne’e ita-nia Juiza lahalo tuir. entaun ida ne’e mak nia hetan pena suspensaun”, nia dehan.
Deolindo hateten, pena suspensaun ba Juiza ne’e repetidu, tanba ne’e mak tenke aplika sansaun disipliñar.
Jornalista: Natalino Costa
Editór : Zezito Silva
