DILI, 24 abríl 2024 (TATOLI)-Prezidente Tribunál Rekursu, Deolindo dos Santos, hateten, Tribunál Rekursu (TR) deside funsiona hikas servisu Tribunál movél hodi fó julgamentu movél ba sidadaun sira ne’ebé pretense ba área juridisaun husi Tribunál Judisiál Baucau, Suai no Dili.
Iha outobru 2023 Tribunál Rekursu hasai desizaun ida hodi suspende servisu Tribunál nian, tanba ho razaun halo hela inspesaun ba servisu Tribunál Movél.
Nune’e hafoin Tribunál Rekursu konklui prosesu inspesaun ba atividade Tribunál Movel, iha abríl 2024 Tribunál Rekursu funsiona fila fali atividade Tribunál Movél nian nune’e halo fali julgamentu movél ba sidadaun sira iha área rurál.
“Tribunál Movél hahú funsiona hikas fali no ohin ita-nia Juíz sira husi Tribunál Suai dezloka ba iha Maliana sira iha ne’ebá semana hodi fó julgamentu movél ba sidadaun sira ne’ebé inklui mós ita-nia Juíz sira husi Tribunál Baucau mós ohin dezloka ba Viqueque sira mós hela Viqueque semana ida hodi fó julgamentu movél ba sidadaun sira,” Deolindo dos Santos ba jornalista sira iha nia kna’ar fatin Caicoli, kuarta ne’e.
Enkuantu Tribunál Movél iha Dili, tuir Deolindo katak, agora daudaun funsiona hela hodi fó julgamentu movél ba komunidade sira iha Dili, Liquiça no Aileu.
“Tribunál Movél iha Dili mós la’o fila fali ona hodi fó julgamentu movél ba ita-nia komunidade sira ne’ebé labele mai to’o iha Dili,” nia adianta.
Tanba Tribunál Movél ne’e atu fasilita sidadaun sira ne’ebé mak distánsia dook, karik sira laiha meiu transporte atu lori sira to’o mai iha Postu no Munisípiu ka sira laiha osan atu halo viajen. Entaun, prezensa Tribunál Movél ne’e mak ida-ne’e atu ajuda sira.
Deolindo hateten, só Oecusse mak Tribunál Rekursu deside la estabelese Tribunál Movél.
“Uluk Tribunál Movél iha maibé agora laiha razaun para halo Tribunál Movel iha Oecuse tanba Oecuse nee munisipiu ida de’it, Oe-cusse ne’e sub distritu hira oan de’it ne’ebé e muito fasil. Úniku munisípiu ne’ebé iha Timor laran laiha difikuldade atu hala’o julgamentu ba arguidu sira no testamuña sira ne’e só Oe-cusse, tanba Oe-cusse ó bolu dala ida-ne’e sira mai kedas depois julgamentu nee la repete dalabarak hanesan iha Dili; dala ruma haat dala lima,” nia dehan.
“Iha Oe-cusse ne’e julgamentu ne’e másimu dala ida dala rua, tanba iha julgamentu buat ne’ebé sira halo ne’e sira konfensa tiha ona, ne’e mak akontese iha ha’u-nia esperiénsia nu’udar Juíz iha Oe-cuse, ne’ebé laiha razaun atu mantein julgamentu movél iha Oe-cuse,” nia konklui.
Notísia relevante:Julgamentu tribunál movél sei funsiona hikas iha tempu badak
Jornalista: Natalino Costa
Editór: Rafael Ximenes de A. Belo
