DILI, 29 abríl 2024 (TAOLI)–Sekretária de Estadu Formasaun Profisionál no Empregu (SEFOPE) organiza funsionáriu no empregadór empreza privada sira hodi hala’o atividade doasaun raan ba Banco de Sangue iha Ospital Nasionál Guido Valadares (HNGV) hodi komemora loron mundial traballadór ne’eb mundus elebra kada loron 01 maiu.
Notísia Relevante: Antigu alunu Salesiano Don Bosco halo doasaun raan
Diretór Jerál Formasaun Profisiónal no Empregu, Carlito Rosário Cabral, hateten objetivu husi atividade doasaun raan ne’e atu bele apoia ba ema sira-ne’ebé moras no presiza raan hodi rekupera sira-nia saúde.
“Iha funsionáriu SEFOPE nian, ita mós konvida empregadór sira setór privadu nomós Ministériu Interiór no Defeza, atu sé mak disponível bele mai hasai sira-nia raan uituan, nune’e bele ajuda no salva ita-nia maluk sira-ne’ebé presiza raan,” Diretór Jerál Formasaun Profisiónal no Empregu ne´e hateten ba jornalista sira iha Caicoli.
Nia hateten, funsionáriu SEFOPE hamutuk 150 mak partisipa iha atividade doasaun raan ba Banco de Sangue HNGV.
Funsionáriu SEFOPE, Jacinto de Sousa Oliveira, hateten atividade doasaun raan ba atividade ida ne’e hanesan asaun solidariedade ida hodi bele ajuda ema seluk.
“Hanesan timóroan ita halo asaun solidariedade ba ita-nia maluk sira-ne’ebé presiza raan iha futuru. Timor-Leste komemora loron mundial traballadór, entaun hanesan sidadaun, ita kontribui ba iha atividade doasaun raan ne’e,” nia hateten.
Reponsável ekipa Banco de Sangue, Enfermeiru Arsenio Afonso, hateten atividade ne’e koordenasaun entre Banco de Sangue HNGV nian no SEFOPE hodi hala’o atividade doasaun raan, atu selebra loron mundiál ba traballadór ne’ebé monu iha loron 01 Maiu, tamba ne’e mak ohin loron funsionáriu iha SEFOPE no mos kompaña balun iha DILI laran fó sira-nia raan atu asegura estoke raan iha HNGV.
“Doasaun raan ne’e mós atu garante estoke raan iha ospitál nasionál no rejionál sira-ne’ebé mak presiza raan. Atividade envolve mós ekipa Cruz Vermelha Timor-Leste, SEFOPE no kompañia balun,” nia dehan.
Nia esplika raan ne’ebé funsionáriu sira hasai voluntariamente ba Banco de Sangue, sei lori ba laboratóriu hodi analiza tipu raan A, B, AB no O, hepatites, HIV/SIDA no Sifilis.
Tuir nia, doasaun raan voluntáriu ne’e bele apoia Banco de Sangue hodi bele atende pasiente sira-ne’ebé presiza atendimentu urjente ba raan.
Notísia Relevante: HNGV rejista doasaun raan 1.332 iha fulan tolu nia-laran
Jornalista : Jesuína Xavier
Editór : Cancio Ximenes
