DILI,01 maiu 2024 (TATOLI)— Konfederasaun Sindikatu Timor-Leste (KSTL) hamutuk ho traballadór sira marsa hodi selebra loron mundiál seguransa no saúde ba traballadór sira iha servisu fatin hahú husi sede KSTL Bemori to’o Palásiu Governu ni oin.
Hosi marsa ne’e rasik trablLadór hotu-hotu konsentra iha PalÁsiu oin hodi ejize ba Governu atu aprova proposta saláriu mínimu ba $150.
Vise-prezidente KSTL, Serafico Soares, hateten, tema ba loron 01 fulan maiu 2024 mak atu halakon injustisa sosiál no hasa’e saláriu mínimu ba $150, entaun husi marsa ida-ne’e hamutuk hodi ejize Governu hodi haree ba kestaun sira ne’e.
“Ami husu ba Governu atu bele aprova prosposta ba saláriu mínimu ba $150 nune’e bele ajuda traballadór sira-nia nesesidade loroloron nian,” Serafico Soares informa ba jornalista sira iha Palásiu Governu ohin.
Nia relata, durante ne’e KSTL rejista kazu diskriminiasaun ne’ebé mak traballadór sira hetan iha sira-nia servisu fatin hanesan empregadór sira halo agresaun fíziku hasoru sira.
Rejista 42
“Iha tinan kotuk ami rejista traballadór sira ne’ebé mak hetan diskriminasaun iha sira-nia servisu fatin hamutuk 400 kazu ne’ebé mak ita fó ona ba iha SEFOPE. Entaun, iha tinan ida-ne’e hosi janeiru mai to’o agora ita rejista ona hamutuk 42,” nia informa.
Nia afirma, kazu sira ne’ebé mak rejista ne’e mai ho kazu oioin hanesan hapara servisu, balun patraun feto basa traballadór, entaun problema sira ne’e mak durante KSTL rejista.
“Bainhira traballadór ida mai keixa nia problema loron ne’e kedas ami halo karta ba empreza ne’ebé mak sira servisu ba, hodi buka ninia kronolojia, maibé ita sai hanesan mediador iha nivel empreza nian. Kazu balun ne’ebe mak la rezolve iha parte traballadór no empregadór nian ita hodi ba iha SEFOPE, maibé SEFOPE mak la iha solusaun nafatin mak ita lori ba Tribunál Distritál Dili,” nia dehan.
Tanba ne’e nia husu ba traballadór sira katak nafatin konsolida malu nune’e bele hamutuk hodi ejiji nafatin direitu traballadór nian hodi bele luta hamutuk ba saláriu mínimu ida-ne’e.
Iha fatin hanesan, Prezidente Konstrusaun Timor-Leste, Roberto Gusmão, husu ba Governu atu haree ba traballadór sira-nia saláriu mínimu ida-ne’e.
“Ita servisu rasik mak hetan, maibé Governu bele rejeita proposta sira ne’ebé aprezenta ba sira, entaun ida-ne’e injustisa mosu iha Timor-Leste, tanba ne’e ita hamutuk halo demostrasaun hodi hasoru ita-nia lideransa istóriku sira, tanba ita haree nesesidade báziku iha merkadu sira folin sa’e, ho saláriu $115 labele rezolve ida-ne’e,” Roberto Gusmão akresenta.
Tanba ne’e ho ejizénsia ne’ebé mak iha husu ba Governu atu kria lei ida ba traballadór atu asegura sira atu moris di’ak no dignu.
Trablhadór hosi Banku BRI Timor-Leste, Inacio Pires de Araujo, ejize Governu hodi haree ba problema saláriu mínimu no hetan diskriminasaun iha serbisu fatin.
“Ami nu’udar traballadór timoroan husi Banku BRI, hakarak hamriik hamutuk ho traballadór timor-oan hotu hodi ejize nafatin saláriu mínimu no iha tempu ida-ne’e ami timoroan iha parte BRI hetan mós diskriminasaun no esplorasaun forsa husi jestór BRI sira. Entaun, ami husu ba Governu no Banku Sentrál atu toma atensaun ba Banku ida-ne’e,” Inacio Pires de Araujo konklui.
Entertantu, marsa KSTL hamutuk ho traballadór sira hodi selebra Loron mundiál Traballadór ne’e hetan seguransa másimu husi Polisia Nasionál Timor Leste (PNTL).
Notísia relevante:KSTL: Traballadór serbisu to’o tinan-10 maibé saláriu nafatin $115 ne’e la justu
Jornalista : Felicidade Ximenes
Editór: Rafael Ximenes de A. Belo
