DILI, 06 maiu 2024 (TATOLI)–Ministériu Edukasaun (ME) liuhusi Diresaun Nasionál Imprensaun, kada tinan prodús kaderneta eskolár hamutuk 40.000 ba kada nível eskolaridade.
“Iha sentru ne’e ita prodús kada nível eskolaridade ba ensinu pre-eskolár ne’e 40.000, ba primeiru no segundu siklu ne’e kaderneta ida de’it 40.000, terseiru siklu prodús mós inklui sekundáriu jerál prodús 40.000. Entaun, ita laiha problema kaderneta tanba ita sempre imprime rezerva nune’e iha eskola ne’ebé presiza no pedidu mai ami, ami despaixa kedas no sira-ne’ebé presiza urjentemente mak tenke mai direita iha nasionál hodi foti,” Koordenadór Gabinete Unidade Kurríkulu Nasionál ME, João Maupelu, informa ba Agência Tatoli, iha ninia knaar fatin, Vila Verde, segunda ne’e.
Notísia relevante : Eskola ESJ 04 Setembru seidauk iha kaderneta eskolár
Nia dehan, ba eskola iha munisípiu Lautém, Bobonaro, no Dili ne’ebé iha nesesidade urjente bele foti diretamente tanba antes ne’e jerente eskola sira halo ona pedidu, nune’e bele foti rasik iha sentru impresaun.
“Kaderneta ne’ebé daudaun prodús ne’e ba estudante ne’ebé foin tama, tanba sira tuan ne’e kompleta ona. Tinan ne’e distribui ona balun, iha meadu fevereiru ita distribui ona 48.000 atu hatán ba pedidu ne’ebé maihusi munisípiu sira, maibé agora pedidu foun tama fali mai, horibainhira ita kontaktu ba munisípiu direita, sei hein iha karik mós ninia pakotementu seidauk hotu,” nia akresenta.
Kaderneta foun mós finaliza ona pakotementu iha armazein, maibé ekipa téknika sira sei la hein pakotementu ne’e hotu mak distribui, bainhira munisípiu sira tun ho transporte no presiza tebes, bele fó kedan kaderneta ne’ebé prodús iha tinan 2024 ba estudante foun sira ne’ebé foin tama, enkuantu kaderneta ba estudante tuan sira prodús ona iha tinan kotuk.
“Kaderneta ba estudante foun ita prodús hotu ona, hein atu distribui de’it. Ita prodús kaderneta ba ensinu báziku primeiru siklu 40.000, ba sira-neʼebé muda husi primeiru siklu ba segundu siklu ne’e, ita prodús hamutuk 45.000. Daudaun ne’e, Ministériu Edukasaun prepara tan 40.000 ba estudante foun sekundáriu jerál iha territóriu no pre-eskolár prodús 30.000,” Koordenadór Gabinete, informa.
Notísia relevante : ME sei atribui kaderneta eskolár rihun 155 ba eskola iha territóriu
Nune’e mós, Xefe Departamentu Kurríkulu Ensinu Pre-Eskolár, Ensinu Báziku, no Ensinu Rekorente, Edia Monteiro, hateten, kaderneta ne’e agora balun iha sentru imprime no iha armazein mós lubuk ida.
“Tinan ida-ne’e laiha problema ba kaderneta, falta hira iha munisípiu tanba buat ida kaderneta ne’e la’ós kestaun ida, tanba ne’e relatóriu finál. Ami husi kurríkulu primeiru siklu nian, ha’u hanoin kaderneta hanesan relatóriu de’it, ne’ebé ministériu kada tinan sempre kompleta, no tinan-ida ne’e mós sei kontinua kompleta kaderneta,” nia esplika.
Jornalista : Osória Marques
Editora : Julia Chatarina
