OÉ-CUSSE, 06 maiu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretáriu Rejionál ba Asuntu Saúde, segunda ohin, reativa hikas Hospital Referál Oé-Cusse, hodi fó atendimentu ba populasaun kada loron.
“Populasaun iha suku Costa barak, kada loron asesu de’it fasilidade saúde ida de’it iha sentru saúde Kiomanteko, ne’ebé polítika Autoridade hakarak hakbesik atendimentu ba populasaun, tan ne’e presiza loke tán fasilidade saúde atu fo atendimentu ba ema hotu ho distánsia besik,” Prezidente Autoridade Interinu, Andre La’o, atuál Sekretáriu Rejionál ba Asuntu Administrasaun, iha ámbitu abertura.
Nótisia relevante: Kuarentena Kiumaonteko sei nakfilak ba sentru saúde Pante Makasar
Sekretáriu Rejionál ba Asuntu Saúde, Luís de Jesus Neno, esplika kona-bá razaun reativa tanba dezde 2021 to’o daudaun Autoridade anteriór deside taka atendimentu iha ospitál referál hafoin sentru saúde Kiomanteko eziste.
Maibé difikulta komunidade sira iha suku Costa parte leste, tanba kada loron ba konsulta konsentra hotu iha postu saúde Kiomanteko, enkuandu sira-ne’ebé hela iha Mahata, Oésono, Oébau obrigatóriu tenke la’o do’ok, nune’e autoridade deside ativa hikas poliklínika ne’e hodi fó atendimentu saúde ba públiku loro-loron.
“Entaun ohin ita hamutuk iha-ne’e atu reativa fila-fali konsulta jerál iha poliklínika Hospitál Referál Oé-Cusse, tanba durante ne’e autoridade anteriór taka tiha, paradu kuaze tinan haat ona, autoridade mós iha planu ona ba oin, presiza harii tán fasilidade saúde ida iha zona sentrál Pante Makasar parte leste nian, nune’e komunidade iha Oébau, Sikluli, Santa-Roza, Kruz, Oésono no Mahata bele hetan tratamentu iha parte leste nian, tantu ita harii postu ka sentru saúde ida tán,” nia katak.
Dirijente saúde ne’e, fó hanoin ba profisionál saúde sira, bainhira fó atendimentu, kumpre étika profisionál, hatudu domin, hodi serbí ba ema hotu, no labele abandona serbisu.
Notísia relevante: Prezidente Autoridade RAEOA deteta problema lima iha Hospital Referénsia Oé-Cusse
Entretantu, totál profisionál saúde iha Rejiaun Oé-Cusse Ambeno hamutuk na’in-419 no na’in-168 mak hala’o serbisu iha Hospital Referál Oé-Cusse.
Jornalista: Abílio Elo Nini
Editór: Evaristo Soares martins
