BOBONARO, 09 maiu 2024 (TATOLI) – Hahú husi fulan-janeiru to’o loron 07 fulan maiu tinan 2024 ne’e Diresaun Terra no Propriedade, Delegasaun Territoriál Munisípiu Bobonaro, rejista arrendatáriu timoroan no estranjeiru hamutuk na’in-97 mak selu taxa ho montante $20,923 hodi kontribui reseita ba kofre Estadu.
Diretór Interinu Terra Propriedade, Delegasaun Territoriál Munisípiu Bobonaro, Castro Laco Martins, esplika, arrendatáriu sira-ne’ebé selu taxa ho kategoria utiliza rai Estadu ba halo atividade komérsiu na’in-71 no rezidénsia na’in-26.
Notísia relevante: DTP Bobonaro rejista arrendatáriu 94 selu taxa ativu
“Taxa ne’e rekolla husi janeiru to’o marsu (trimestre primeiru) ne’e hamutuk $18,962, osan ne’e mai hosi arrendatáriu 97, husi abríl to’o maiu ne’e mak hamutuk $20,923,” nia koa’lia iha Maliana, tersa.
Nia dehan, durante ne’e ekipa observa arrendatáriu barak kumpre devér selu taxa ativu kada fulan.
“Sira uluk selu atrazu, entaun tusan ne’e selu seidauk hotu, sira iha na’in-lima mak kona multa, maibé agora di’ak tanba iha tinan kotuk iha dívida ne’e rihun $30-resin, maibé tinan ne’e tún ona, hela de’it $9,909,” nia katak.
Nia relasa, atu hasa’e taxa ba kofre Estadu, iha tempu badak ekipa Diresaun Terra Propriedade hamutuk ho autoridade munisipál Bobonaro, sei tún direita ba terrenu atu indentifika prioritáriu estadu no privadu abandonadu ne’ebé komunidade no governu Indonézia no Portugés husik hela.Tuir nia, atividade sei hala’o uluk iha postu administrativu Maliana Vila hafoin ba kobre postu administrativu sira seluk, nune’e bele jere no administra.
“Ita hala’o identifikasaun hotu tiha, sei fó kontratu arrendamentu ba sira, nune’e hasa’e reseita ba Estadu, ne’ebé ami husu ba komunidade sira okupa rai ho estadu, atubele koopera selu taxa, tanba liuhosi taxa ita bele dezenvolve ita-nia munisípiu,” nia fó hanoin.
Notísia relevante: DTP Bobonaro kontribui reseita rihun $20 iha trimestre dahuluk
Jornalista: Sérgio da Cruz
Editór: Evaristo Soares Martins
