MALIANA, 09 maiu 2023 (TATOLI) – Diresaun Terra no Propriedade (DTP) no Servisu Kadastru Munisípiu Bobonaro, rejista arrendatáriu hamutuk 94 mak sei selu taxa ativu hodi kontribui reseita ba kofre estadu.
Diretór Diretór Terra no Propriedade Munisípiu Bobonaro, Castro Laco Martins, esplika, arrendatáriu ativu sira-ne’e maioria sidadaun timoroan no ema estranjeiru sira-ne’ebé okupa proprietáriu estadu nian, iha postu administrativu Balibo, Atabae maibé barak iha kapitál Maliana.
Notísia relevante: DTP Bobonaro kontribui reseita rihun $20 iha trimestre dahuluk
“Ita-nia arrendatáriu atuál ne’e iha 94, maioria sira selu ativu, iha balun mak la ativu, maibé sira mai halo deklarasaun selu oituan-oituan, tanba sira halo duni negosiu iha merkadu, iha fatin sira estadu identifika, maibé osan mak laiha, tanba kompete ho ema estranjeiru sira araska la halimar, rendimentu mak laiha, fulan ida sorte di’ak sira hetan $100, dalaruma lae, sira hakarak selu maibé osan tama mak laiha,” nia informa ba jornalista sira iha Maliana, tersa ne’e.
Nia dehan, taxa ne’ebé arrendatáriu na’in-94 kontribui iha tinan kotuk hamutuk orsamentu rihun $72-resin no iha trimestre dahuluk tinan ne’e rihun $29,590.
Diretór Castro subliña, iha tinan ne’e iha arrendatáriu foun na’in-10 mak submete ona proposta atu hetan kontratu arrendamentu atubele uza priorietáriu estadu ba halo atividade negósiu.
Nia dehan, tipu kontratu arrendamentu iha oin tolu, ba sira-ne’e selu hahú hosi dolar $1 to’o dolar $90, Ministru Justisa atribui kompeténsia bele asina kontratu de’it iha munisípiu.
Enkuantu hosi dolar $100 bele iha Sekretariu Estadu Terra no Propriedade no dolar $200 ba leten Ministru Justisa rasik mak asina kontratu arrendamentu.
“Sira na’in-10 ne’e agora sei iha faze proposta, dalaruma iha eleisaun hotu sira bele prepara ona, tanba ha’u orienta ona tékniku sira atubele prepara sira-nia kontratu atu selu daudaun ona,” nia katak.
Enkuantu arrendatáriu hirak-ne’e mesak sidadaun timoroan, ne’ebé uza proprietáriu estadu atu halo atividade negósiu hanesan; loke loja, kioske kiik, ofisina no seluk tán.
DTP mós iha tempu badak sei halo identifikasaun ba proprietáriu estadu no abandona ne’ebé estadu portugés no Indonézía husik hela iha Timor-Leste.
Maibé diretór Castro dehan, sei halo levantamentu uluk iha Kapitál Maliana hafoin hakat ba postu administrativu sira.
“Ami hein de’it, se iha seña oan ruma atubele tau ba transporte, tanba orsamentu mos sei laiha. Ami hein hela nia prosesu, la hatene bainhira karik, sé ida-ne’e iha ona ami komesa book-aan ona,” nia akresenta.
Notísia relevante: DTP sei hahú identifika rai no uma estadu iha Maliana
Jornalista : Sérgio da Cruz
Editór : Evaristo Soares Martins
