BOBONARO, 15 maiu 2024 (TATOLI) – Karreta Ambulánsia multifunsaun ne’ebé destaka iha Sentru Saúde Komunitária (SKK), postu administrativu Lolotoe, munisípiu Bobonaro, la halo operasaun dezde fulan-marsu tanba avaria hela.
Xefe suku Opa, postu administrativu Lolotoe, Moisés da Costa, esplika, problema ne’e difikulta tebes komunidade ne’ebé moras liuliu inan isin-rua atu partu iha fasillidade saúde.
Notísia relevante: Saúde Bobonaro prepara ambulánsia rezerva rua atende CHC hitu
“Ami postu Lolotoe fulan-tolu liu ona, ambulánsia grave, araska tebes, ha’u-nia komunidade na’in-haat atu ba partu iha Sentru Saúde Lolotoe, maibé labele partu iha-ne’ebá tanba ho kondisaun la permite, entaun sira tenke halo rujukan mai ospitál Maliana, ambulánsia laiha, sira tenke aluga karreta privadu ho montante osan $150,” nia informa ba jornalista sira iha Maliana, kinta ne’e.
Problema ne’e parte responsável Sentru Saúde Lolotoe hato’o ona ba Servisu Saúde Munisipál Bobonaro atu buka meiu halo subtituisaun temporária hodi fasilita transportasaun emerjénsia husi Lolotoe ba Ospitál Referál Maliana.
“Maibé agora seidauk iha tanggapan ruma hosi ita-nia nai-ulun sira, agora seidauk rezolve problema iha Loloto’e,” nia hateten.
Diretór Servisu Saúde Munisípiu Bobonaro, Gíl Bernardo Vicente, rekonese ambulánsia referida avaria fila-fali hafoin halo manutesaun iha Dili.
Nia subliña, to’o agora seidauk iha subtituisaun ambulánsia foun, maibé sei koloka fali karreta ambulánsia husi sentru saúde seluk ba apoia, bainhira atu halo transferénsia pasiente ho emerjénsia.
“Ha’u hakarak informa ba komunidade Lolotoe, tanba karreta ita-boot sira, ami esforsu ba hadi’a moos aat nafatin, ne’ebé ami husu ita-boot sira-nia pasiénsia, ami sei tenta nafatin ba Ministériu Saúde atu hadi’a,” Gil Bernardo ba Tatoli iha Ritabou, sesta ne’e.
Tuir dadus monografia katak autoridade munisipál Bobonaro tinan 2022, postu administrativu Lolotoe iha aldeia 20, suku hitu ho totál populasaun 7,695 komposta hosi feto 3,882, mane 3,813 no totál xefe fámilia 1,591.
Notísia relevante: Líder komunitária husu Governu rezolve kondisaun estrada Zuloil-Lolotoe
Jornalista : Sérgio da Cruz
Editór : Evaristo Soares Martins
