BOBONARO, 11 maiu 2024 (TATOLI)–Prezidente Autoridade Munisípiu (PAM) Bobonaro, Alexandre Pires, sábadu ne’e, hatuur fatuk dahukuk ba projetu instalasaun sistema gravitasaun bee-moos iha aldeia Tasmil, suku Lontas, postu administrativu Lolotoe, munisípiu Bobonaro, ne’ebé tama iha Planu Integradu dezenvolvimentu Munisipál (PDIM) tinan 2024.
Atividade ne’e akompaña husi Primeiru Sekretáriu Autoridade munisipál ba asuntu Administrasaun no Finansa, Domingos da Costa, Segundu Komandante Komandu Polísia Munisípiu Bobonaro, Asistente Superintendente, Joel Casemiro de Carvalho, inklui Diretór Servisu munisipál sira.
“Ha’u husu ba kompañia atu implementa projetu ne’e ho responsabilidade, ba líder komunitária sira tenke kontrola beibeik projetu ne’e para finaliza lalais tanba ita-nia komunidade presiza tebes asesu bee-moos,” PAM Alexandre hato’o.
Notisia Relevante : PAM Bobonaro lansa projetu PDIM 2024
Iha fatin hanesan, Xefe suku Lontas, Duarte da Costa, sente orgulu no apresia ho Governu tanba bele realiza projetu ne’e.
“Ha’u-nia komunidade buka bee-moos kleur tebes ona, maibé ohin loron lansa duni projetu ida-ne’e, konstrusaun bee-moos dahuluk iha tinan 1996, ne’e kleur tebes, mai halo reablitasaun iha tinan 2012 hotu tia to’o agora komunidade la hetan bee,” nia tenik.
Projetu instalasaun sistema gravitasaun bee-moos ho naruk metru 700, ne’ebé gasta osan rihun $200 resin. Obra ne’e sei fornese bee-moos ba populasaun hamutuk 327 husi uma-kain 84.
Jornalista : Sérgio da Cruz
Editora : Julia Chatarina
