DILI, 14 Maiu 2024 (TATOLI) – Rai produtivu hamutuk ektare 200 iha parte Salele seidauk utiliza dezde 2021, tanba irrigasaun ki’ik ida husi Nabuk ne’ebé fornese bee ba natar maran ona.
Diretór Servisu Agrikultura Covalima, Lino Magno, informa iha munisípiu ne’e iha rai produtivu hamutuk ektare 500 atu kuda hare, maibé foin maka utiliza ektare 300.
“Ita sei falta ektare 200 maka seidauk utiliza, tanba ne’e husu mós apoiu mai ministériu karik tinan ida ne’e la biban, bele planu ba tinan oin hodi bele uza hotu rai sira ne’e”, Lino Magno dehan iha Comoro, ohin.
Nia salienta katak natar sira ne’e agora du’ut mak moris nakonu, tanba ne’e husu ba Ministériu Agrikultura atu disponibiliza tratór hodi fila tiha rai sira ne’e no karik bele uza fali ba kuda batar rai maran, nune’e bele tulun mós hasa’e produsaun iha tinan ida ne’e.
Aleinde problema terrenu ektare 200 ne’ebé abandonadu, iha mós difikuldade balun hanesan falta estensionista no Agrikultura Covalima, tuir planu asaun anuál 2025, sira husu atu rekruta tékniku foun hamutuk na’in-10 hodi reforsa serbisu iha suku sira hodi hasa’e produsaun hare.
Iha sorin seluk, Diretór-Jerál Agrikultura, Kafé no Planta Industriál, Martinho Laurentino Soares, afirma katak planu Governu nian ne’ebé daudaun ne’e implementa husi Ministériu Agrikultura, Pekuária, Peska no Floresta maka oinsá atu aselera produsaun ai-han sira iha rai-laran, nune’e bele atinje alvu ne’ebé iha.
“Rai sira ne’ebé seidauk utiliza, sei uza hotu hodi halai natar atu kuda hare sira, nune’e bele hasa’e produsaun ba tinan lima nia laran. Tanba ne’e, hahú tinan 2024 ba oin ne’e ministériu halo ona esforsu hodi tau prioridade ba natar abandonadu sira, inklui irrigasaun no aumenta ekipa téknika sira, hodi atinje meta ne’ebé determina ona”, dehan.
Tuir planu, to’o tinan 2028, Timor-Leste bele iha ona natar ektare rihun 50 no produsaun foos atinje 70%. Tanba ne’e, nia husu ba Servisu Agrikultura munisípiu no tékniku sira atu konsolida kbiit hodi fó apoiu ba diresaun-jerál no nasionál iha baze, tanba kestaun produsaun ai-han no envolvimentu ekipa téknika sira ne’e importante tebes.
“Kestaun importante ida mak atu kompleta númeru tékniku iha munisípiu, tanba suku barak ninia ekipa téknika seidauk sufisiente. Ne’e duni, kuandu númeru ne’e kompleta ona bele garante produsaun ai-han iha rai-laran bele aumenta”, nia espera.
Notísia relevante: Populasaun Covalima presiza hasa’e produsaun hare-kulit
Jornalista: Tomé Amado
Editora: Maria Auxiliadora
