DILI, 28 maiu 2024 (TATOLI)—Deputadu KHUNTO, António Verdiál de Sousa, husu Governu liuhusi ministériu kompetente atu halo reabilitasaun ba ospitál nasionál, referál, rejionál no postu saúde balun ne’ebé kondisaun ladún di’ak ona hodi fó atendimentu di’ak liután ba populasaun.
“Ita haree situasaun Ospitál Nasionál Guido Valedares (HNGV), ospitál referál Maliana, Covalima, Maubisse, Baucau ho ospitál rejionál sira seluk ho postu saúde sira seluk, ne’ebé iha territóriu nasionál ne’ebé ninia kondisaun komesa aat. Prinsipalmente HNGV, ho urjénsia tebes, husu Governu inísia halo reabilitasaun ba HNGV, hodi mellora atendimentu saúde ba populasaun,” nia hato’o iha reuniaun plenária Parlamentu Nasionál, tersa ne’e.
Haree ba razaun ne’e, bankada ezije ba Governu hodi halo reabilitasaun ba ospitál hodi fó prioridade iha Governu konsituisionál da-sia.
Vise Ministru ba asuntu Parlamentár, Adérito Hugo da Costa, hateten kona-ba reabilitasaun fasilidade saúde hanoin Ministéiru Saúde tau ona planu tinan ne’e hodi halo reabilitasaun ba ospitál nasionál, referál, rejionál no postu saúde iha territóriu.
Jornalista : Nelson de Sousa
Editór : Cancio Ximenes
