DILI, 31 maiu 2024 (TATOLI)- Daudaun ne’e nesesidade báziku liu-liu foos ho kilograma 25, folin sa’e to’o $20, nune’e autoridade munisipál hahú kria ekipa task force hodi kontrola no halo inspensaun ba estabelesimentu komersiál sira iha Viqueque.
Iha loron sesta ne’e (01/06) , Jornalista Agência TATOLI konsege rekolla tabela folin foos iha loja LM maka hanesan foos Ikan Mas 20kg ho folin $15, Gostu Loos 20kg ho $16, Biruang merah 20kg ho $15, Amor do Familia 20g ho $15, Makikit 20kg ho $15.5, Manu Vitoria 25kg ho folin $19,5, Rajawali 25kg ho presu $18, Ama Gosta 25kg ho $19, Folson 20kg $20, Mangkok Merah 15kg, $15. Presu foos manu Vitoria ne’ebé faan iha kioske sira Beloi ho 25kg ho presu $19,5,
Notísia relevante: Reprezentante povu preokupa folin foos sa’ e
Presu folin atuál husi fulanAbríl to’o Maiu ramata seidauk iha mudansa presu foos iha merkadu sira inklui loja sira iha kapitál Viqueque.
Ho situasaun ne’e, Prezidente Autoridade Munisípiu (PAM) Viqueque, Francisco C.S de Gonzaga Soares, deside forma ekipa task force ne’ebé akumula servisu munisipál hanesan Diresaun Seguransa Alimentar AIFAESA no Diresaun sira seluk ne’ebé toma konta ba ekonómia no sosiál inklui Polisia atu halo intervensaun ba folin nesesidade báziku iha merkadu.
“Ba planu monitorizasaun nesesidade báziku iha merkaduria Viqueque tanba folin nesesidade sa’e makas afeta ba pouplasaun sira. Tuir planu atividade inspeksaun sei realiza iha tempu badak tanba ami mós halo ona koordenasaun ho AIFAESA no sei prosesa negosiante ne’ebé faan ho folin liu padaun ne’ebé governu deside ona,” PAM Viqueque ne’e promote.
Folin foos sa’e tanba kontribui husi empreza distributór
Iha fatin ketak, Jestór Loja Borala, Florêncio Armindo da Concieção G. da Costa, hateten, kona-ba presu foos iha fulan-Maiu ida-ne’e folin sei nafatin hanesan iha fulan-Abríl tanba empreza distribuitór sira seidauk redus folin. Nune’e loja sira faan bazeia ba presu ne’ebé distribuitór faan.
“Iha ami-nia loja presu nesesidade báziku liu-liu folin foos to’o agora seidauk tun. Tanba ami ba sosa iha distribuitór sira iha Dili folin sei matein hanesan fulan-Abríl, nune’e ami faan presu hanesan fulan kotuk. Se ami hatun folin ami mak lakon fali ne’ebé presu sei matein”, katak Florêncio
Iha loja ne’e nia dehan daudaun ne’e presu folin foos ho marka Folsom 25kg, ho presu $22, Saku kinur Nona manis $18.50, foos manu Vitoria 20kg folin $16.5, foos 25kg ho $18 no presu foos folsom 20kg folin $20, Foos Rajawali 20kg ho $15, Rajawali 25kg, $18.5 amor de familia 20kg ho $15, Gostu Loos 25kg ho $19, ikan mas 25kg ho $18,5, manu vitória 25 kg ho $19.5, nona manis 25kg ho $19, no foos Perisos gostu loos 25kg ho $18,5.
Povu laiha kbiit sosa foos
Xefe suku Bahatata, Postu Administrativu Uatucarbau, munisípiu Viqueque, Patrício Maria Pinto, preokupa tebes tanba folin nesesidade báziku liuliu foos ne’ebé sa’e makas iha merkadu Viqueque to’o área rurál halo populasaun laiha kbiit atu sosa.
“Ami haree hanesan folin foos 20kg marka Ikan Mas, Gostu Loos, Biruang merah, Amor do Familia, Makikit, Manu Vitoria folin agora $19, maibé foos 25kg folin sa’e $20 to’o 22. Enkuantu ba fali supermie uluk falun haat $1 agora falun tolu $1, masi-midar uluk folin $1 agora sa’e ba $1.5, no kafe tali ida uluk $1.5 agora folin sa’e $2.00. Folin sa’e bei-beik povu mak susar ka laiha ona kbiit atu sosa. Ami hanoin Governu haree mós presu nesesidade bázika atu povu bele sosa hodi responde ba nesesidade uma laran ”, nia afirma ho laran triste.
Komunidade suku Bahatata, Martinha Lopes mós preokupa loos folin nesesidade báziku ne’e sa’e makas loos iha área rurál, nune’e sira laiha kbiit atu sosa.
“Ami husu Governu atu halo intervensaun lalais tanba ami laiha ona kbiit atu sosa hodi han ho ami nia família”, nia husu.
Notísia relevante:Observa direta armazein tolu, PM orienta MCI kontrola folin-kualidade foos iha merkadu
Jornalista : Vitorino Lopes da Costa
Editór : Florencio Miranda Ximenes
