DILI, 18 juñu 2024 (TATOLI)—Komisaun Organizadora ba Preparasaun Vizita Papa Francisco iha Timor-Leste, deside fó responsabilidade ba madre sira husi kongregasaun Salesiana ka Filhas de Maria Auxiliadora (FMA) atu halo dekorasaun altar ba misa solene ne’ebe Papa Francisco prezide iha Tasi-Tolu.
Notísia Relevante: Marco Sprizzi: Konstrusaun altar santu iha Tasi-Tolu sei hela hanesan muzeu
Vise Koordenadór ba Vizita Papa hosi Igreja no atuál Pároku Igreja Motael, Guilhermino da Silva, hateten preparasaun ba dekorasaun ne’e madre kongresaun Salesiana aprezenta ona planu ba iha komisaun organizadora ba vizita amu Papa nian.
“Iha ornamentu ai-funan nian iha Tasi-Tolu, madre sira-ne’ebé sei hola parte iha servisu ne’e mak madre sira hosi kongresaun Salesiana sira mak toma konta iha ne’ebá, tuir sira-nia planu ne’ebé sira aprezenta ba komisaun,” Vise kordenadór ba vizita Papa hosi igreja no atual Pároku Igreja Motael, Guilhermino da Silva, hateten ba Agência Tatoli, iha Motael, tersa ne’e.
Nia esplika, ai-funan sira-ne’ebé sei reflete ba espíritu ekolojia ninian katak ema hotu tenke hadomi Timor-Leste nia natureza no hadomi mós meiu ambiente ka hanesan uma hamutuk katak mundu ne’e atu nia iha nafatin moris..
“Iha momentu misa Tasi-Tolu ne’e mós ita la uza ai-funan sira-ne’ebé bele dehan kuu ai-funan nia funan mai husi nia hun, ita kuu mak nia funan depois mak ita lori mai enfeita, lae. Madre sira aprezenta sira-nia servisu ne’e, planu sira-ne’ebé iha ne’e sira kuda kedas ai-funan no ai-hun balun,” nia dehan.
Madre Salesiana sira identifika ona ai-funan balun no ai-hun sira-ne’ebé iha jeitu no furak atu enfeita ba altar ba misa nian, nune’e oras ne’e daudaun sira prepara hela no kuda ona ai-funan sira-ne’e.
Vise koordenadór ne’e hateten, komisaun sei aprezenta hela ba iha Vatikanu hodi halo aprovasaun ba iha dezeñu ornamentu ba altar ne’e rasik ba modelu infeita no ornamentu.
“Modelu infeita no ornamentu ne’e labele helik no taka ba selebrasaun misa. Vatikanu konkorda mak ita bele hala’o no ezekuta,” nia hateten.
Aleinde ne’e, nia dehan, fatin enkontru entre amu Papa ho relijozu no relijioza no padre sira, seminarista no katekista iha igreja Katedrál Dili ne’e sei responsabiliza hosi madre sira husi kongresaun Carlos Borromeu.
Entretantu, fatin enkontru entre Pontífise Papa Francisco ho joven sira iha Sentru Konvensaun Dili CCD, sigla portugés) ne’e sei infeita husi Madre sira husi kongresaun Canosiana.
Vise kordenadór hateten, ornamentu ba fatin rua ne’e simples no profisionál ba enkontru de’it. Fatin tolu ne’e mak ida Tasi-Tolu, Sentru Konvensaun Dili no Katedral kada seksaun no kongresaun, bispu indika ona no aprezenta hotu ona sira-nia servisu no planu.
Tuir nia, ornamentu labele atrai ema-nia atensaun ka ema-nia konsentrasaun ne’e ladún di’ak ba iha enkontru.
“Fatin tolu ne’e ho nia planu aprezenta hotu ba iha Vatikanu, depois komisaun simu no Vatikanu aprova mak foin halo ornament,” nia dehan.
Notísia Relevante: Papa Francisco sei vizita Timor-Leste iha 09-11 setembru 2024
Jornalista : Jesuína Xavier
Editór : Cancio Ximenes
