DILI, 19 juñu 2024 (TATOLI)-Ministru Obras Públika Samuel Marçal garante katak, tinan ne’e MOP sei finaliza eletrifikasaun iha territóriu nasionál tanba tuir dadus falta 12% mak seidauk kobre iha suku sira.
“Eletrifikasaun iha territoriu nasionál ne’e tuir relatóriu tékniku sira hato’o mai ha’u katak iha nivél suku ita kuaze atinji ona 98%, signifika iha suku eletrisidade kuaze tama hotu ona, falta de’it ona suku haat hanesan ne’e mak seidauk,” Samuel Marçal hateten ba Jornalista TATOLI bainhira partisipa iha reuniaun Konsellu Ministru Palasiu Governu kuarta ne’e.
“Nível aldeia maizmenuz falta 15 %; balun ita sei dada ho eletrisidade mas aldeia balun ne’ebé eletrisidade la konsege tama tanba haree ba distánsia tanba komunidade sira balun hela dodok malu balun sae ba foho-lolon. Entaun, tinan ne’e ita planeia atu loke konkursu hodi bele halo ona istalasaun ba rin eletisidade hodi e fornese eletrisidade ba suku no aldeia sira ne’ebé asesu eletrisidade,” ministru Samuel hatutan.
Hatan kona-ba aldeia sira ne’ebé dook eletrisidade difisil atu tama, governante ne’e hateten, tinan ne’e Ministeriu Obras Públiku sei loke konkursu hodi empreza manan-na’in bele fornese de’it Solár Panel.
“Ba aldeia sira ne’ebé mak ita haree eletrisidade labele to’o iha ne’ebá tanba distánsia, entaun tinan ne’e Ministériu Obras Públika mós hanoin ona atu loke konkursu no espera katak tinan ne’e bele hetan empreza di’ak ida para ita hahú instalasaun ba solar panel hodi forneseba aldeia sira ne’ebé rurál tebes tebes hela foho leten ka dook hosi sidade atu sira bele asesu ba eletrisidadade,” nia konklui.
Notísia relevante:EDTL garante tinan ne’e suku iha territóriu tomak bele asesu eletrisidade
Jornalista: Natalino Costa
Editór: Rafael Ximenes de A. Belo
