DILI, 17 jullu 2024 (TATOLI) – Ministru Obras Públiku (MOP), Samuel Marçal hateten, família uma-kain 20-resin ne’ebé hetan despeju administrativa iha área Aitarak-Laran husi Sekretáriu Estadu Asuntu Toponímia Organizasaun Urbana (SEATOU), iha Abríl, hetan ona pagamentu ba indimnizasaun.
“Uma-kain sira iha Aitarak-laran naton ekipa konjunta husi SEATOU sobu ne’e ita kuaze halo hotu ona pagamentu, ne’ebé ita rezolve lois ona, so uma-kain ida de’it mak seidauk selu tanba nia la konkorda ho presu ne’ebé Governu fó,” Ministru Samuel hateten ba jornalista sira iha Palásiu Governu, kuarta ne’e.
Governu halo pagamentu bazeia ba dadus ne’ebé tékniku sira foti husi tereñu no tuir kondisaun uma nian.
“Ita selu bazeia ba konstrusaun ne’ebé mak sira investe ona, iha Aitarak-laran ita selu balun $3,000, balun $5,000, balun $10,000, balun $11,000,” Ministru ne’e afirma
Ministru ne’e dehan tan, iha Bidau, Aimutin no fatin seluk Governu sei halo hela identifikasaun ka levantamentu dadus tanba familia uma-kain hirak ne’e presiza hatama númeru konta Banku nune’e Governu haree loos ona bele halo pagamentu.
“Iha Bidau nian ita sei halo hela identifikasaun tanba naton ne’e SEATOU sobu uluk tiha depois mak ita halo identifikasaun ikus, entaun ita sei haree didi’ak mak bele selu. Iha Ai-mutin Uma-kain hamutuk 18 ne’ebé ita sobu atu hadi’a estrada ne’e sei prosesu levantamentu dadus, tanba tékniku sira sei halo hela kontajen uma balun atu hetan hira, balun kona moru karik hetan hira ne’ebé sei kompleta hela dokumentu ba ida ne’e nian,” nia katak.
Molok ne’e, ekipa konjunta ezekuta serbisu bazeia ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun rezíduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.
Jornalista: Hortencio Sanches
Editór: Florencio Miranda Ximenes
