LIKISA, 10 Abríl 2026 (TATOLI)—Governu liuhusi Autoridade Inspesaun Fiskalizasaun Atividade Ekonomia no Sanitária Alimentár (AIFAESA) lansa no asina kontratu ho empreza Ocean ba projetu reabilitasaun laboratóriu aihan no instalasaun ekipamentus AIFAESA nian ne’ebé lokaliza iha Tibar, Munisípiu Líkisa.
Termu kontratu ne’e asina diretamente husi Vise-Primeiru-Ministru, Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay, akompañadu husi entidade tutelada sira hotu.
Vise-Primeiru-Ministru, Ministru Koordenadór Asuntu Ekonómiku no Ministru Turizmu Ambiente, Francisco Kalbuadi Lay, hateten ohin loron sai hanesan momentu importante no istóriku ida, tanba marka lansamentu ba reabilitasaun Laboratóriu Nasionál AIFAESA nian iha Tibar.
“Projetu reabilitasaun ida-ne’e iha signifikadu estratéjiku boot tebes ba ita-nia nasaun, liuliu iha esforsu atu reforsa seguransa no kualidade alimentár iha Timor-Leste,” Vise Primeiru-Ministru hateten iha nia diskursu iha serimónia lansamentu ne’e iha Laboratóriu AIFAESA Tibar, ohin.
Laboratóriu ida ne’e sei sai hanesan instituisaun prinsipál ida-neʼebé fó apoiu tékniku ba Governu no setór relevante sira hodi asegura katak alimentu neʼebé tama no konsumidu husi komunidade seguru, saudável no tuir padraun internasionál.
“Ho implementasaun projetu ida-ne’e, ita espera katak kapasidade téknika no operasionál laboratóriu nasionál sei aumenta, liuliu iha área teste, kontrolu kualidade no monitorizasaun alimentu, ida-ne’e mós sei kontribui ba protesaun saúde públika no promove konfiansa ba produtu alimentár sira iha merkadu nasionál no internasionál,” nia dehan.
Iha oportunidade ida-ne’e, nia konvida ema hotu atu kontinua hamutuk ho espirítu kooperasaun, responsabilidade no kompromisu atu asegura katak projetu ida-ne’e implementa ho di’ak no fó benefísiu másimu liuliu ba saúde públika povu timoroan hotu no dezenvolvimentu sustentável nasaun nian.
“Tanba ho lansamentu ida-ne’e, Governu reafirma kompromisu atu kontinua dezenvolve infraestrutura no sistema ne’ebé apoia saúde públika no dezenvolvimentu sustentável nasaun nian,” nia hateten.
Inspetora Jerál AIFAESA, Odete Maria Viegas, informa ohin loron AIFAESA marka istória importante ida tanba bele estabelese ona laboratóriu nasionál ida hodi halo teste ba aihan importasaun, esportasaun no kotaminadu sira-ne’ebé operadór ekonómiku faan iha merkadu interna.
“Entaun, importánsia husi labortóriu ida-ne’e mak bainhira Timor-Leste integra ona iha ASEAN no OMK, tenke garante ninia kualidade produtu, asegura saúde públika no hetan konfiansa husi populasaun,” nia dehan.
Nia informa, projetu reabilitasaun ne’e Governu prevee uluk osan hamutuk rihun $250 maibé ne’e ba de’it reabilitasaun, entaun ho hanoin ida kokrdena ho KAFI hodi aprova fundu infraestrutura hamutuk millaun $1.3, ne’ebé fahe ba pakote integradu tolu hanesan resbilitasaun, instalasaun ekipamentu no tékniku IT nian.
“Tanba ne’e husi ohin ba oin kompañia sei hahú ona ninia servisu tanba planu kontratu ne’e sei ramata to’o de’it fulan-neen,” nia esplika.
Nia hatutan, aleinde kompañia implementa ninia servisu, AIFAESA mós sei kapasita rekursu umanu liuliu tékniku sira iha área kímiku no mikrobéria na’in-20 durante fulan rua iha Indonézia, Singapura no rai-laran, atu nune’e sira bele servisu iha laboratóriu ne’e ho di’ak.
Entretantu, projetu ne’e hetan apoiu mós husi Governu Indonézia ne’ebé sei apoiu ekipamentu reajente balun inklui fasilita kapasitasaun rekursu umanu ba tékniku laboratóriu AIFAESA nian.
Jornalista : Alexandra da Costa
Editór : Cancio Ximenes
