DILI, 25 jullu 2024 (TATOLI)– Prezidente Repúblika, José Ramos Horta, kuarta ne’e, hala’o reuniaun semanál ho Premeiru-Ministru, Kay Rala Xanana Gusmão , hodi diskute kle’an seguransa nasionál, nune’e bele garante seguransa iha komemorasaun loron FALINTIL, loron Konsulta Populár no vizita Amu Papa Francisco.
“Ha’u hasoru malu ho Primeiru-Ministru, ami ko’alia liu kona-bá kestaun seguransa tanba iha fulan-Agostu ho Setembru mai ne’e tanba atividade barak loos,” Xefe Estadu relata ba jornalista sira hafoin reniaun ho Xefe Governu iha Palasiu Presidensiál, Bairru-Pité, Dili.
Iha loron 10 to’o 11 Agostu, Prezidente India, Droupadi Murmu, halo vizita Estadu mai Timor-Leste. Iha loron 13 Agostu Premiadu Novel ba Pás na’in-haat to’o iha Timor-Leste. Iha 20 Agostu komemora loron FALINTIL. Iha 28 Agostu Sekretáriu Jerál Organizasaun Nasaun Unida (ONU) to’o iha TL. Nune’e mós iha loron 9 to’o 11 Setembru simu vizita Amu Papa Francisco.
Xefe Estadu observa durante fulan-rua ne’e servisu todan ba Polisia Nasionál Timor-Leste (PNTL) , maibé tenke halo koordenasaun di’ak, nune’e atividade hotu bele la’o ho susesu.
“Iha fulan-rua ne’e servisu todan ba seguransa sira, tenke koordena malu halo didi’ak hodi fó susesu ba atividade sira ne’e, ita la’ós iha ameasa ruma, maibé kontrola populasaun sira, organiza halo didi’ak atu labele iha problema, tanba iha eventu boot ne’e ema barak hakarak halai dudu malu to’o mosu konflitu, seguransa sira mak tenke haree ba situasaun sira ne’e,” nia dehan.
Atu garante seguransa, Xefe Estadu ko’alia ona ho Primeiru-Ministru, hodi iha loron 9 Agostu atu realiza reuniaun Konsellu Superiór Defeza no Seguransa (KSDS), hodi análiza kona-ba situasaun no preparasaun ba atividade hotu ne’ebé akontese iha fulan Agostu-Setembru.
Fasilita sarani sira iha Vizita Amu Papa
Xefe Estadu husu ba Governu atu halo jestaun di’ak no fasilita durante vizita Amu Papa mai iha Timor-Leste tanba sarani rihun ba rihun mak sei partisipa.
“Vizita Papa nian ne’e ema barak mak sei mai partisipa, rihun ba rihun, nune’e Governu tenke halo jestaun di’ak fasilita bee, sintina no fatin tanba durante loron tolu iha Tasi-Tolu no Dili laran no seluk tan ne’ebé Governu tenke prepara másimu,” Horta husu.
Maski nune’e, Xefe Estadu tau konfiansa tomak ba Governu kolabora ho Igreja hodi halo preparasaun ne’ebé di’ak hodi hasoru eventu bo’ot ne’e.
Biban ne’e, Horta husu ba populasaun hotu atu prepara aan ho di’ak hodi simu Papa-Fransisco ne’ebé sei to’o Timor-Leste iha 09-11 setembru tinan ida ne’e. Husu ba joven sira atu kria pás hodi labele halo konflitu ba malu.
Jornalista: Hortencio Sanchez
Editór: Florencio Miranda Ximenes
