DILI, 26 jullu 2024 (TATOLI)–Prezidente Konsellu Kurativu Fundasaun Meskita Annur, Abdullah Said Sagran, konsidera mídia TATOLI iha servisu ne’ebe justu halo kobertura ba atividade musulmanu nian hodi fahe informasaun ba sosiedade.
Notísia Relevante: PR Horta husu TATOLI hala’o servisu jornalizmu ho imparsiál
Prezidente ne’e fahe informasaun nakait ho loron aniversário Tatoli nian ba dala 8 ne’ebé sei selebra iha loron 27 Jullu tinan-tinan.
Nia esplika selebra tinan ualu ezisténsia Tatoli nian kompara ho idade ema nian karik foin mak tama iha idade labarik nianlabarik nian karik bo’ot oituan ona.“Uluk nanain ha’u hakarak hato’o ha’u nia parabéns ba Tatoli ne’ebé halo ona tinan ualu”.
“Se ita haree ba kotuk, Tatoli halo buat barak liuliu sempre mai iha ne’e informa ba komunidade atividade komunidade musulmanu sira-nian. Ida-ne’e hatudu katak lá halo diskriminasaun ne’ebé sai ezemplu ba mídia sira seluk, tanba halo knaar ho justu no loloos. Ha’u haree, Tatoli ne’e di’ak,” Prezidente Konsellu Kurativu Fundasaun Meskita Annur, Abdul Said Sagran, hateten ba Agência Tatoli, iha Kampung Alor, kinta (24 jullu 2024) ne’e.
Nia hateten, ba oin Tatoli hodi bele hasa’e kbiit ka atu bele kompete ho evolusaun teknokojia iha mundu tuir era globalizasaun avansadu.
“Ha’u espera imi hotu iha Tatoli hasa’e kbiit, tanba ba oin ne’e, ita sei halo kompetisaun ba oin. Ita tenke esforsu, liuliu meiu teknolojia oioin. Ita buka akompaña nu’udar ferramenta ba fahe informasaun,” nia sujere.
Nia reforsa, Tatoli bele prepara aan ba futuru oinsá halo kobertura ba atividade sira-ne’ebé la’o iha ASEAN, tanba Timor-Leste sei adere ba ASEAN iha tempu badak.
“Tatoli kapasita aan atu bele kobre atividade iha ASEAN nian ne’ebé fó influénsia ba dezenvolvimentu Timor nian. Loke liras ba rai li’ur. Tatoli iha informasaun kualidade, tanba ha’u seidauk rona konflitu no reklamasaun boot,” nia dehan.
Iha parte seluk, Pastór Igreja Protestante Hosana iha Timor-Leste, Lorenço dos Santos, kongratula Tatoli ba aniversáriu da-ualu (8) ne’ebé kada tinan selebra iha loron 27 jullu..
“Parabéns ba aniversáriu da-ualu (8). Maske idade sei nurak, maibe nafatin serbisu makaas no esperansa ho di’ak,” nia hateten ba Agência tatoli liuhusi WatsApp.
Nia hein, ba futuru Tatoli sai meiu no fatin ba ema hotu hodi hato’o ideia no aspirasaun ba Estadu, Governu Timor-Leste kona-ba situasaun reál ne’ebe mak povu hasoru durante ne’e.
Notísia Relevante: Membru PN rekomenda TATOLI tenke garante kualidade informasaun
Jornalista : Jesuína Xavier
Editór : Cancio Ximenes
