OÉ-CUSSE, 30 Jullu 2024 (TATOLI) –Tribunál Distritál Oé-Cusse (TDO) rejista, entre Janeiru no Jullu, kazu pendente hamutuk 492, husi númeru ne’e maioria kontrabandu, informa Juíz Administradór, Argentino Luisa Nunes.
“Kazu krime to’o 29 Jullu 2024 ne’e rejista ona iha sistema 260 prosesu, ne’e ba koletivu no ba singulár iha 130. Kazu krime ne’ebé pendente iha Tribunál Oé-Cusse hamutuk 363, ba prosesu sivíl rejista 129. Totál kazu sivíl no krime hamutuk 492”, Juíz Administradór hateten iha Oé-Cusse.
Nia dehan funsionamentu iha Tribunál Oé-Cusse nafatin enfrenta problema tanba númeru juíz la sufisiente no ba koletivu tenke bolu juíz seluk, liuliu husi Dili nian mak taka.
Ba juíz singulár laiha problema, maibé kestaun mak kazu koletivu ejize juíz na’in-tolu no to’o agora de’it mós númeru ne’e seidauk prienxe tanba Oé-Cusse iha de’it juíz na’in-rua.
Argentino Nunes iha esperansa ba juíz foun sira atu koloka iha Oé-Cusse, maibé desizaun oin seluk no sira tenke bá tuir formasaun komplementár iha rai-li’ur.
“Entaun mehi ne’ebé atu hatún kazu pendente iha tinan ida nia laran ne’e la akontese, tanba falta juíz. Se juíz na’in-tolu, entaun kazu pendente sira-ne’e ita bele rezolve ona”, nia espera.
Notísia relevante: Féria judisiál, julgamentu iha Tribunál Oé-Cusse ba de’it kazu urjénsia
Nia fundamenta katak kazu pendente maka’as liu, mak kazu krime kontrabandu, enkuantu abstratu no violasaun seksuál rejista uitoan.
“Tanba ne’e mak tribunál halo nia ekipa ida hodi halo ona estudu, depois fó ona paresér ba deputadu sira atu husu sira halo alterasaun ba iha Kódigu Prosesu Penál nian, ne’ebé ezije iha juíz na’in-tolu atu tesi kazu sira-ne’ebé konjuga penál ne’e”, nia relata.
Notísia relevante: Kazu 400-resin pendente iha Tribunál Distritál Oé-Cusse
Jornalista: Abílio Elo Nini
Editora: Maria Auxiliadora
