OÉ-CUSSE, 01 Agostu 2024 (TATOLI) – Ministériu Edukasaun (ME) apoia $22.500 hodi reakiza desportu eskolár iha nivél ensinu báziku iha Rejiaun Administrativa Espesiál Oé-Cusse Ambeno (RAEOA).
Sekretária Rejionál Edukasaun no Asuntu Sosiál, Inácia Tamele, informa katak intesaun husi desportu eskolár ne’e nu’udar jogu amizade entre ensinu báziku, ne’ebé hetan tulun husi Ministériu Edukasaun atu kria atividade iha tempu eskola feriadu, prinsipalmente atu hametin relasaun entre eskola ida ho eskola seluk.
“La’ós atu buka manán ka lakon, maibé promove talentu estudante sira, tanba durante iha prosesu aprendizajén sira hetan teoria kona-ba desportu, oportunidade ne’e atu halo prátika, sira bele hatene entre teoria no prátika nia implementasaun. Depois ekipa téknika sei halo selesaun ba fini, karik iha futuru jogu iha nivél nasionál bele koloka de’it”, Inácia Tamele dehan iha Oé-Cusse, ohin.
Iha sorinn seluk, Prezidente Komisaun Organizadora, Orlando Colo, hateten atleta ne’ebé partisipa iha desportu eskolár ne’e hamutuk 352 husi enkola bázika 16, ne’ebé kada eskola reprezenta atleta na’in-20. Jogu ne’e iha modalidade ida de’it mak voleiból feto no mane
Orlando Colo adianta katak husi montante osan ne’ebé iha, ba prémiu lugar sei simu $800, segundu $700, terseiru $700 no kuartu $500.
“Maibé, tanba desizaun husi technical meeting katak kada eskola rekomenda atu ofersese prémiu ho ekipamentu desportu, kadernu no lapijeira, ne’ebé osan sei fahe, balu sei koloka ba material sira-ne’e”, nia informa.
Metódiu Xavier, nu’udar profesor desportu husi Eskola Bázika Filiál (EBF) Banaef-Manat, sente kontente no husu Governu ba futuru persiza kontinua atividade referida, nune’e bele anima estudante tantu husi área urbana komu rurál, tanba liuhusi jogu amizade bele dezenvolve desportu.
“Atividade tenke kontinua, karik tinan ne’e foin realiza espra ba tinan sira tuirmai implementa nafatin, aumenta tan modalidade seluk hanesan foteból no basketból, tanba daudaun ne’e modalidade voleiból de’i”, nia sujere.
Jornalista: Abílio Elo Nini
Editora: Maria Auxiliadora
