DILI, 20 agostu 2024 (TATOLI) – Xefe Departamentu Emerjénsia, iha Hospital Nasional Guido Valadares (HNGV), Julia Rodrigues Quintão, informa kada loron, iha ospitál, númeru pasiente aumenta iha sala emerjénsia maibé kama no espasu mak la to’o.
Xefe Departamentu Emerjénsia, hateten diariamente iha emerjénsia simu pasiente hamutuk 50 to’o 160, hanesan loron baibain, maibé bainhira loron ferias ka fim de semana, númeru ne’e aumenta liután, hosi ida-ne’e, entaun sala emerjénsia hasoru problema kama no espasu.
“Kama iha 35 maibé haree ho númeru pasiente ne’e insufisiente kadavez pasiente mai barak ami nafatin esplika ba pasiente no família pasiente katak ami atende nafatin, maibé tuur de’it iha kadeira sira. Maibé sira ne’ebé mai ho kondisaun grave ami tenke muda oinsá sira ne’ebé di’ak hela mai tuur fali sira ne’ebé ho kondisaun grave hanesan iis boot, hirus matan moras, raan fakar, ami muda ba kama hodi toba tanba ita problema ho kama no espasu la sufisiente”, Julia Rodrigues Quintão, informa ba jornalista sira iha HNGV, ohin.
Nia afirma, fasilidade sira iha ospitál sei nafatin presiza tanba pasiente kada loron sempre mai barak no ai-moruk sira koko atu responde tuir pasiente nia nesesidade bainhira iha emerjénsia, se laiha, kontatu ho farmasia hodi rezolve.
“Kona-ba nesesidade iha emerjénsia, ami iha hodi responde ba pasiente sira-nia hakarak, liuliu ai-moruk”, nia afirma.
Diretora Administrasaun Finansa no Lojístika iha HNGV, Sara Maria Freitas Xavier, antes ne’e, hateten, atu rezolve espasu ne’ebé dignu ba pasiente sira, hein konstrusaun Hospitál Pediatria Kuidadu Intensivu (OPKI) andar lima no projetu andar haat ba sala maternidade ne’ebé sei remata iha tempu tuir mai.
“Ha’u sente andar lima ho andar haat ne’e halo hotu, HNGV bele iha ona espasu ne’ebé sufisiente hodi simu ita-nia pasiente sira hosi teritóriu tomak”, Sara Maria Freitas Xavier esplika.
Nia informa, projetu andar lima ba pediatria nian agora atinje 34%, no mós kona-bá projetu andar haat ne’ebé finansia hosi JICA, tinan oin sei hahú ona konstrusaun.
Jornalista: Felicidade Ximenes
Editór : Zezito Silva
