BOBONARO, 26 agostu 2024 (TATOLI)-Reitór Universidade da Paz (UNPAZ), Adolmando Soares Amarál, akompaña husi Dekandu Fakuldade Saúde Públika no Siénsia Médika (FSPCM, sigla portugés), Cipriano do Rosário Pacheco, segunda ne’e entrega estudante departamentu enfermajen na’in-138 ba autoridade munisípiu Bobonaro hodi halo estájiu klínika enfermajen durante fulan-ida semana-rua.
Estajiadu hirak ne’e sei halo estajiu iha fasilidade saúde sira hanesan Hospital Referál Maliana na’in-70, sentru saúde Atabae 17, Balibo 17, sentru saúde Maliana 17 no Cailaco 17.
Notísia relevante: UNPAZ-UNDIL hasa’e kualidade liuhusi investimentu rekursu umanu iha rai-laran no rai-li’ur
“Ha’u hanoin hanesan ema akadémiku, ita tenke tún mai sente, saida mak povu sente, toba ho sira, haan ho sira lori hatene sira-nia situasaun, depois ida ne’e fila ba ko’alia ho reprezenta povu, enkunatu o latún mai senti, la han saida mak sira haan,” Reitór UNPAZ, Adolmando Soares Amarál, heteten iha salaun Maria-Tapo.
Nia fundamenta, prezensa estajiadu hirak-ne’e sei ajuda enfermeiru iha fasilidade saúde sira hodi halo atendimentu ba pasiente ne’ebé moras.
“Ha’u atu dehan tanba saida mak ami tenke lori sira mai, intermu siénsia sira aprende iha universidade,nmaibé esperiénsia tenke hetan husi na’in hira ne’ebé halo tiha ona servisu iha fasilidade saúde sira ho tempu kleur, atu nune’e bele iha balansu,” nia katak.
Prezidente Autoridade Munisípiu Bobonaro, Alexandre Pires, konsidera prezensa estudante hirak-ne’e importante tebes hodi apoia serbisu atendimentu iha fasilidade saúde.
Nia husu ba profissñionál saude sira atu fahe siénsia no esperiénsia hotu nune’e estajiadu sira bele aprende hodi kompleta sira-nia estudu iha nível unversitáriu.
“Buat ne’ebé sira lahetene, hanorin sira atubele hatene, hodi bele prepara rekursu umanu, tanba aban bainrua ita sira ne’e laiha ona, sira mak sei kontinua servisu iha área saúde ida-ne’e ba ita-nia povu.”
Diretór Ezekutivu Hospitál Referál Maliana, José da Cruz, prontu simu no fahe esperiénsia tomak ba estajiadu hirak-ne’e.
“Ami osipitál nia papél mak fó formasaun no peskiza, ne’ebé ita-boot sira bele mai prátika iha ne’ebá, fasilidade iha 2005 mai 2024 iha mudansa,” nia akresenta.
Enkuantu programa estajiu klinika enfermajen ne’e realiza iha munisípiu lima hanesan Aileu, Ermera, Liquiçá, Covalima no Bobonaro, ho totál ema na’in-383.
Notísia relevante: Estudante UNPAZ hala’o prátika profisionál iha Oé-Cusse
Jornalista: Sérgio da Cruz
Editor: Evraisto Soares Martins
