DILI, 28 agostu 2024 (TATOLI)–Konsellu Administrasaun Autoridade Portuariu Timor-Leste (APORTIL. I.P) hahú halo mudansa ba atividade operasaun iha 02 setembru relasiona ho vizita amu Papa nian ne’ebé sarani sira husi Oé-Cusse sei aluga ró Berlin Nakroma.
Prezidente APORTIL, José Oliveira Leong, hateten APORTIL informa ba públiku kona-ba movimentasaun pasajeiru entre Rejiaun Administrasaun Epesiál Oé-Cusse Ambeno (RAEOA)-Dili sei iha mudansa ba oráriu operasaun Ró ahi Belin Nakroma relasiona ho vizita sua Santidade Papa Francisco mai Timor-Leste.
“Sarani sira husi parokia Oé-Cusse hamutuk 2.344 sei aluga ró ahi Berlin Nakroma hodi partisipa misa solene ne’ebé sei prezide husi Amu Papa iha Tasi-Tolu iha loron 10 setembru iha tuku 16h30 lorokraik. Tanba ne’e mak APORTIL hakarak informa ba pasajeiru sira kona-ba mudansa ba orariu ida-ne’e hodi públiku bele hatetne no hetan informasaun,” Prezidente APORTIL, José Oliveira Leong, hateten liuhusi liuhusi konferénsia imprensa, iha Portu Dili.
Ró Berlin sei hala’o operasaun tuir mudansa oráriu ne’ebé fó sai bazeia ba atividade Santu Padre nian iha Timor-Leste, no hakarak hato’o ba komunidade RAEOA sei tula sarani hamutuk 2.344 atu partisipa misa solene iha Tasi-Tolu.
Prezidente mos hateten, APORTIL sei hapara totál servisu portuáriu iha Dili hahú loron 07-11 stembru, no sei opera fila-fali iha loron11 lorokraik hodi transporte fila-fali pasajeiru ka sarani sira ba Oé-Cusse, maibé la taka dalan ba públiku ne’ebé iha nesesidade atu mai Dili no ba Oé-Cusse.
APORTIL mós husu Ministru Transporte no Komunikasaun atu autoriza ba iha APORTIL hodi fó presu billete $10 ba-mai ba sarani sira tuir pedidu Prezidente Autoridade RAEOA nian ho númeru Referénsia 347/RAEOA-tl/VIII/2024 ne’ebé APORTIL deside ona.
Jornalista : Jesuína Xavier
Editór : Cancio Ximenes
