DILI 07 setembru 2024 (TATOLI)–Ekipa avansada husi munisípiu Manufahi prepara ona karreta 100-resin hodi transporta peregrinu hamutuk 3.000 mai Dili iha loron 09 setembru, hodi partisipa misa solene ne’ebé prezide husi Papa Francisco iha Tasi-tolu, iha loron 10 setembru.
“Peregrinu sira mai husi postu Alas, Fatuberlio no Same hamutuk, enkuantu Turiskai hein iha Maubisse depois tun mai dala-ida,” Reprezentante ekipa avansada husi munisípiu Manufahi, Jean Paulo Crús da Costa, informa ba Agência Tatoli, iha fatin konsentrasaun peregrinu, Comoro, sábadu ne’e.
Ekipa avansada husi Manufahi to’o ona Dili horiseik (06/09) hodi halo preparasaun ba fatin konsentrasaun peregrinu sira-nia inklui prepara kondisaun ba peregrinu sira ne’ebé sei hamriik iha estrada públiku hodi simu Amu Papa.
“Sarani husi Manufahi hamutuk 150 sei forma simu Papa Francisco iha Palásiu Pezidensiál nia oin no labarik feto ida mak sei kaer no tara tais ba Papa hodi hatudu simbólika identidade Manufahi nian,” nia akresenta.
Notísia relevante : Igreja-Governu halo inspesaun ba fatin konsentrasaun halibur sarani sira husi munisipiu
Tanba ne’e, ekipa avansada husi munisípiu Manufahi daudaun ne’e hein simu peregrinu sira.
“Ami preparadu ona hodi simu ita-nia peregrinu husi Manufahi, sira preparadu tanba salaun tolu mak komisaun prepara, peregrinu husi postu Turiskai nian toba salaun ida, Fatuberliu salaun ida, Same mós iha salaun ida, no Alas mós iha salaun ida iha kotuk, ami laiha problema kona-ba fasiliidade sira, prontu no hein simu,” Jean Paulo, relata.
Hanesan sarani katólika, nia sente orgullu no kontente tanba oportunidade akompaña Papa Francisco mai Timor-Leste ne’e hanesan momentu espesiál ida.
“Ha’u orgullu no apresia, nune’e ha’u hakarak simu Papa Francisco. Espera ho Papa nia prezensa ne’e bele lori pás no fó tulun ba ita-nia Estadu no Governu ida-ne’e hodi moris iha estabilidade no armonia,” nia katak.
Governu aloka ona $40.000 hodi transporta peregrinu sira husi Manufahi mai Dili, ne’ebé fahe $20.000 ba transporte no restante ba hahán.
“Kona-ba hahán ita fó osan ba Kámara Komérsiu Indústria mak tein, prepara no fahe de’it ba peregrinu durante vizita Papa Francisco nian,” nia katak.
Enkuantu, kona-ba karreta, balun Governu oferse no iha balun husi empreza lokál no xineza sira mak oferese.
“Ita-nia mak prepara kombustível, ita la selu no gratuita de’it,” Jean Paulo, hato’o.
Jornalista : Osória Marques
Editora : Julia Chatarina
