VIQUEQUE, 23 setembru 2024 (TATOLI)- Servisu Saúde Munisípiu Viqueque (SSM) hamutuk autoridade munisípiu Viqueque, segunda ne’e, lansa vasina Virus Papilloma Umanu (HPV, sigla inglés), hodi prevene kankru serviks iha Eskola Ensinu Báziku Sentrál (EBC, sigla portugés), Cabira-Oan, Postu Viqueque Vila.
Hafoin ramata lansamentu, Diretór Interinu Servisu Saúde Munisípiu Viqueque, Fernando Soares, esplika, vasina ida-ne’e ida atu hasa’e protesaun imunidade ba estudante sira liuliu feto ne’ebé agora klase 7 no klase 9 sira hodi prevene ba moras kankru serviks.
Notísia relevante:Vasina HPV prevene kankru serviks
“Se ita-nia oan feto sira la hetan vasina ida-ne’e, posibilidade bo’ot sira bele hetan kankru serviks, kankru anus, kangru evafora no kankru garganta. Tanba ne’e ami prefere estudante idade husi 11 to’o 14 hotu-hotu tenke hetan vasina ida-ne’e”, Fernando Soares, ba Agência Tatoli, iha EBC Cabira-Oan, ohin.
Fernando profunda, estudante sira maka futuru nasaun nian nune’e presiza proteje sira-nia saúde hodi moris saudavél no konseitu ida feto forte nasaun forte.
“Nune’e, ohin ita lansa ona vasina ida-ne’e ba oin, ami-nia ekipa profisionál saúde sira sei kontinua tama sai eskola sira iha munisípiu Viqueque hodi fó vasina ba ita-nia estudante feto husi idade elejivel, atu estudante sira bele asesu hotu ba vasina referida. Ami mós sei tama komunidade sira hodi fó vasina ba labarik feto sira-ne’ebé la hetan vasina. Depois sira simu tiha vasina ami sei oferese mós kartaun vasina ba estudante sira, hodi rai ho di’ak”, nia realsa.
Iha fatin hanesan, Diretór Servisu Edukasaun Munisípiu Viqueque, Julio Sakadura, haktuir Servisu edukasuan munisípiu Viqueque sei kontinua koopera ho servisu saúde munisípiu hodi fó vasina ba estudante feto sira ne’ebé ho idade 11 to’o 14.
“Implementasaun programa vasina kankru serviks ne’ebé ohin lansa ona iha eskola Cabira-oan, vasina ne’e sei ba to’o eskola EBC 18 no ninia filiál 77 ne’ebé existe iha munisípiu Viqueque, atu estudante sira hetan hotu vasina ba prevensaun moras sira-ne’ebé ita la espera”, nia afirma.
Tuir dadús estudante feto ho idade 11 to’o 14 iha munisípiu Viqueque ne’ebé sai alvu ba simu vasina HPV hodi prevene kakreu servisk ho hamutuk 1.274.
Notísia relevante:Profisionál saúde na’in-30 partisipa formasaun molok implementa vasina HPV
Jornalista : Vitorino Lopes da Costa
Editór : Florencio Miranda Ximenes
