DILI, 08 outubru 2024 (TATOLI) – Autoridade Nasionál Petróleu (ANP) hamutuk ho Empreza Eni Timor-Leste no Sekretáriu Estadu Arte no Kultura (SEAK) hala’o lansamentu ba projetu Biblioteka Nasionál.
Lansamentu ne’e hala’o iha loron 07 outubru iha eskritóriu ANP nian, hodi marka pasu importante ida hodi promove edukasaun no alfabetizasaun iha sosiedade. Estabelese bazeia ba Dekretu Lei Nú. 62/2023, ANP hala’o papél importante hodi jere no regula atividade petrolífera iha Timor-Leste, inklui operasaun tasi-laran no rai-maran.
Institutu ne’e dedika atu garante jestaun responsável ba rekursu sira no oras ne’e habelar nia foku hodi inklui projetu komunitáriu sira ne’ebé importante hanesan Biblioteka Nasionál.
Projetu Biblioteka Nasionál ne’e finansia hosi Empreza Eni Timor-Leste no Governu Timor-Leste liuhosi Sekretáriu Estadu Arte no Kultura (SEAC), ho objetivu atu hadi’a Kompleksu Biblioteka Nasionál iha Hudi Laran, Dili.
Projetu ne’e Jere husi ANP inklui dezeñu enjeñaria komprensivu, konstrusaun no ikus mai fornese ba públiku ho asesu gratuitu ba informasaun oioin liuhosi livru no mídia dijitál.
Hein katak biblioteka sei sai hanesan plataforma ida ba edukasaun no envolvimentu kulturál, hodi sai hanesan sentru ba estudante sira, peskizadór sira no públiku en-jerál.
“Nia misaun maka atu haburas domin ba leitura no aprendizajen durante moris tomak liuhosi fornese rekursu no programa oioin ne’ebé adapta ba interese no grupu idade oioin”, dehan komunikadu imprensa husi ANP ne’ebé TATOLI asesu ohin.
Programa no workshop espesiál sira sei hala’o atu garante katak biblioteka envolve komunidade ho efetivu, hodi permite feedback no envolvimentu ne’ebé reflete komunidade nia nesesidade no aspirasaun oioin. ANP, SEAK no Eni iha kompromisu atu halo asesu ba informasaun nu’udar direitu báziku ida, serbisu ba futuru ida ne’ebé ema hotu bele habelar sira-nia orizonte.
Jornalista : Felicidade Ximenes
Editór : Zezito Silva
