DILI, 10 outubru 2024 (TATOLI) – Primeiru-Ministru (PM), Kay Rala Xanana Gusmão, agredese ba Governu Malázia ne’ebé oferese millaun $3 ba formasaun diplomata timoroan sira.
Primeiru-Ministru hato’o sentidu agradesimentu ne’e durante enkontru ho ninia omólogu Primeiru-Ministru Malázia, Anwar Ibrahim iha Sentru Konvensaun Nasionál (NCC, sigla inglés), Vientiane, Repúblika Demokrátika Populár (RDP) Laos, foin lalais.
“Agradese ba apoiu hotu-hotu ne’ebé Malázia oferese, partikularmente millaun $3 ba formasaun diplomata timoroan sira no ita kontinua servisu hamutuk,” PM Xanana hateten iha nota ne’ebe TATOLI asesu husi media Gabinete PM.
Malázia anunsia estabelesimentu filiál dedikadu ida hosi Institutu Diplomasia no Relasaun Estranjeiru (IDFR), hodi fó formasaun bá diplomata timor-oan sira, enkoraza mós Timor-Leste atu haruka reprezentante sira bá objetivu ida-ne’e.
Iha okaziaun ne’e, Malázia re-afirma kompromissu hodi aselera Timor-Leste nia adezaun bá ASEAN, ho objetivu ba progresu durante Prezidénsia Malázia nian iha tinan oin.
Xefe Governu Malázia fó konsellu ba Timor-Leste atu hasa’e foku ba pilár ekonómiku atu fornese mós atualizasaun regulár kona-bá progresu.
Líder rua ne’e mós diskute kona-bá vizita ofisiál Timor-Leste nian ba Malázia iha tinan ne’e nia rohan, iha ne’ebé sei aborda liu-tán tópiku sira-ne’e ho assuntu bilaterál sira seluk.
Delegasaun TL ne’ebé akompaña PM Xanana iha enkontru bilaterál ne’e maka Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministra Solidariedade Sosiál no Inkluzaun, Verónica das Dores, Vise Ministra Asuntu ASEAN, Milena Maria da Costa Rangel, Embaixadór Timor-Leste iha Laos, Filomeno Aleixo da Cruz no Xefe Gabinete Primeiru-Ministru, Elizabeth Exposto.
Jornalista: Hortencio Sanchez
Editór : Florencio Miranda Ximenes
