DILI, 15 outubru 2024 (TATOLI)–Diretór Nasionál Irrigasaun iha Ministériu Agrikultura, Pekuária, Peska no Floresta (MAPPF), Jacinto Vicente Filipe Gama, hateten Governu liuhusi MAPPF kontinua tulun hodi fornese bee husi irrigasaun Maliana I ba natar, nune’e agrikultór sira bele halai natar.
Notísia Relevante: Komisaun D rekomenda MAPPF kontinua halo manutensaun irrigasaun Maliana I
“Kanál ida-ne’e iha duni problema, maibé agrikultor sira uza nafatin hodi halo natar,” Diretór Nasionál Irigasaun iha Ministériu Agrikultura, Pekuária, Peska no Floresta (MAPPF), Jacinto Vicente Filipe Gama, hateten ba Agência Tatoli, hodi hatán ba iha preokupasaun komisaun D ne’ebé trata asuntu ekonomia no dezenvolvimentu iha Parlamentu Nasionál kona-ba manutensaun ba irrigasaun Maliana I no kanál irigasaun mota Buipira iha Bobonaro, iha Comoro.
MAPPF mos halo hela estudu ida hodi bele kanál bee foun ida atu reforsa kanalizasaun bee ba agrikultór sira-nia natar iha área Maliana I.
“Kanál ida-ne’e mak kuandu aat, Maliana I labele kedas asesu kanalizasaun ba irrigasaun bee ba natar, ida-ne’e mak sira tauk no ami mós tauk. Tanba, ida-ne’ebá ne’e halo ponte mak bee liuhusi leten. Agora ne’e di’ak, maibé aat uitoan-uitoan ona. Atu halo tan ponte ida foun, tanba ne’e rua ne’e sei uza hotu,” nia dehan.
Nia garante, kanalizasaun bee liuhusi ponte Buipira nian ne’e la’o di’ak nafatin hodi fornese bee ba agrikultór sira hodi halo natar.
Intek ba irrigasaun Maliana I ne’ebé reabilita husi Ajénsia Kooperasaun Internasionál Korea Súl (JICA) nian foin lalais ne’e, tanba ne’e mak kontinua la’o ho di’ak.
Iha zona Maliana nian, nia hateten, iha mákina pezadu rua maibé depende ba volume serbisu ne’ebé iha hodi halo intervensaun ba irrigasaun bainhira iha fallansu ruma.
“Mákina pezadu rua ne’ebé iha ne’e atu responde mai to’o iha área Atabae no Liquiça sorin,” nia dehan.
Jornalista : Jesuína Xavier
Editór : Cancio Ximenes
