DILI, 18 outubru 2024 (TATOLI)–Sekretaria Estadu Igualdade no Inkluzaun (SEII), Elvina Sousa Carvalho, hateten, sosiedade Timor-Leste presiza muda mentalidade oinsá feto sira bele hetan direitu ba rai.
Notísia Relevante: Sekretária Estadu Elvina prefere feto asesu ba rai-propriedade hodi empoderamentu ekonómiku
“Provizaun legal ka lei sira fó dalan ba feto atu feto sira mós bele iha direitu na’in ba rai, maibé kulturalmente la fó dalan ne’ebé sei diskrimina feto labele sai na’in ba rai. Ida-ne’e fila-fali ba feto maluk sira katak se iha ona lei ne’ebé ko’alia kona-ba ita iha direitu na’in ba rai, bele hetan eransa rai, uma no sasán sira-ne’e,” Sekretária Estadu Igualdade no Inkluzaun (SEII), Elvina Sousa Carvalho, hateten ba jornalista sira iha Caicoli.
Iha konstituisaun Repúblika Demokrátika Timor-Leste, iha artigu 17 deskreve feto no mane iha direitu no obrigasaun hanesan iha moris família, kulturál, sosiál, ekonómiku no polítiku nia laran.
Iha artigu 4º iha Lei 13/20217 rejime titulu ba rai kona-ba igualdade ba direitu sira prevee direitu propriedade ba bein imovel sei asegura ho kondisaun hanesan ba mane no feto, no bandu kualkér forma atu halo diskriminasaun ba titularidade, asesu, jestaun, administrasaun, gozu, transferénsia ka dispozisaun bein imovel nian.
Iha mós Lei nú. 8/2017 kona-ba Eispropriasaun ne’ebé prever atu hetan eransa hanesan bein movel no imovel.
Governante ne’e, nia dehan, enkoraja feto timoroan ne’ebé hakarak rekere sira-nia direitu atu hetan eransa ka rai iha família.
Nia garante, lei iha ona entaun feto sira tenke brani hamriik hodi rekere direitu ba rai, tanba oan feto ka mane iha direitu no obrigasaun hanesan na’in ba rai no direitu ne’ebé hanesan iha lei nia oin.
“Agora ita tenke rekere ita-nia direitu, ha’u enkoraja feto maluk sira hotu ne’ebé mak sai vítima, liuliu iha família rasik ne’ebé mak diskrimina sira atu labele na’in ba rai. Ezemplu, inan-aman tuur hamutuk deside fahe rai ba sira, maibé la envolve feto sira hodi fó rai ba sira-nia oan feto sira, ha’u hanoin ida-ne’e kontra lei,” nia dehan.
Tuir nia, esensia husi objetivu mak ema hanesan iha lei nia oin no mós feto ka mane iha direitu ne’ebé hanesan, ne’eduni husu favór ida ba feto sira tenke rekere sira-nia direitu.
Jornalista : Jesuína Xavier
Editór : Cancio Ximenes
