OÉ-CUSSE, 24 Outubru 2024 (TATOLI) – To’os-na’in sira iha suku 13 iha simu ona fini husi Sekretaria Rejionál ba Asuntu Agrikultura, Rejiaun Administrativa Espesiál Oé-Cusse Ambeno (RAEOA) atu kuda iha époka udan.
Fini ne’ebé distribui mak hanesan batar noi-mutin, hare variedade foun, shorgum no fore-rai.
“Distribuisaun fini agora ne’e, ami-nia tékniku sira la’o ona iha suku 13, ne’ebé apoia barakliu mak batar noi-mutin. Falta suku lima mak ami seidauk distribui, maibé sei esforsu oinsá atu realiza iha tempu badak”, Diretór Rejionál Agrikultura Oé-Cusse, Amaro Efi, relata ohin.
Notísia relevante: ANAPROFIKO-TL kapasita asosiasaun produtór fini komersiál lima iha Oé-Cusse
Suku lima ne’ebé seidauk hetan fini mak Malelat iha sub-rejiaun Pássabe, Bobometo no Usitaqueno iha sub-rejiaun Oésilo, Laliksuk iha sub-rejiaun Pante Makasar no Ban-Afi iha sub-rejiaun Nítibe.
“Iha planu atu kontinua fahe antes udan monu rai, tanba distribuisaun ne’e la kanaliza direta ba agrikultór sira, maibé indika direta ba estensionista suku sira mak hatene kria jestaun no mekanizmu atu fahe ba grupu ne’ebé identifika ona”, dehan.
Kona-ba stock fini iha Diresaun Agrikultura ne’e la sufisiente, tanba ne’e sei husu apoiu ba grupu asosiasaun lima ne’ebé estabelese iha Oé-Cusse mak sei prepara fini, nune’e mós sei hetan tulun husi Ministériu Agrikultura.
Notísia relevante: RAEOA harii asosiasaun no grupu ualu prodús fini komersiál
Grupu asosiasaun lima ne’ebé eziste iha Oé- Cusse dezde 2015 ne’e envolve uma-kain 119 mak hanesan asosiasaun Eno-Naek Lifau iha suku Lifau, no Mekosikaloti iha suku Naimeko, sub-rejiaun Pante Makasar, asosiasaun Tasa’e Sele iha suku Usitasa’e, sub-rejiaun Oésilo, Banofa iha suku Abani, sub-rejiaun Pássabe, asosiasaun Kisan Kalbikase iha suku Lela-Ufe, sub-rejiaun Nítibe.
Notísia relevante: Suku haat aprezenta pedidu ba Agrikultura Oé-Cusse hodi apoia fila-rai
Jornalista: Abílio Elo Nini
Editora: Maria Auxiliadora
