OÉ-CUSSE, 29 outubru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, promete iha tempu-badak sei estabelese ona Konsellu Konsultivu hodi kontribui haforsa liña koordenasaun hodi mellora prestasaun servisu iha administrasaun Oé-Cusse.
“Ita tenki foti konsellu konsultivu, sei junta entidade barak inklui xefe suku sira, agora ita seidauk bele halo, tanba lakle’ur-tán ita sei loke suku foun, bainhira eleisaun hotu entaun ita sei harii konsellu konsultivu ida, mais reprezentativu ho xefe suku foun ne’ebé eleitu. Ida atu reforsa no akompamentu saida mak ita halo iha Oé-Cusse,” Rogério Lobato, ko’alia iha Otél Ambeno.
Notísia relevante:FOTO ATUÁL: Tomada pose ba dirijente foun iha RAEOA
Papél hosi Konsellu Konsultivu, tuir artigu 23 lei númeru 3/2014 (Krisaun RAEOA), atu fó konsellu ba Prezidente Autoridade ba asuntu importante ne’ebé iha ligasaun ho lala’ok dezenvolvimentu iha Oé-Cusse.
Rogério Lobato, informa mós katak, daudaun ne’e Autoridade RAEOA sei la’o hela ho lei organika autoridade anteriór nian, nune’e iha tempu-badak sei prepara hodi aprezenta ba Governu Sentrál.
“Ita tenki halo lei organika hodi lori ba Governu Sentrál liuhusi Konsellu Ministru, atu-bele hetan aprovasaun, ne’ebé daudaun ne’e uta seidauk iha maibé ita la’o ho anteriór nian,” nia adianta.
Notísia relevante:Arsénio Bano fó pose ba Konsellu Konsultivu na’in-hitu
Entretantu, tuir lei númeru 3/2014 kona-ba kriasaun Rejiaun Administrativa Espesiál Oé-Cusse Ambeno no estabelese Zona Espesiál Ekonomia Sosiál Merkadu (RAEOA-ZEESM), prevista iha artigu 23 (Konsellu Konsultivu), númeru 1 hateten, konsellu konsultivu nu’udar órgaun ne’ebé koadjuva ba Prezidente Autoridade iha toma desizaun.
Konsellu konsultivu mak orgaun ne’ebé fó tulun ba Prezidente Autoridade hodi foti desizaun. Númeru 2 hosi artigu ne’e dehan, konsellu konsultivu ne’e prezide hosi Prezidente Autoridade no hasoru malu iha sorumutu pelumenus fulan-ida dala-ida.
Númeru 3 hosi artigu ne’e mensiona, Prezidente autoridade tenke hala’o konsulta konsellu konsultivu molok nia foti desizaun importante no mós define regulamentu administrativu rejionál, regra ne’e la aplikável bainhira Prezidente hakarak hala’o nomeasaun no ezonerasaun ba pesoál ka no sansaun disiplinár sira seluk.
Númeru 4 husi artigu ne’e mensiona, konsellu konsultivu, tuir ninia inisiativa própria ka tuir pedidu Prezidente Autoridade nian, iha prosesu orsamentu nian, fó tulun ba elaborasaun orsamentu no mós hato’o paresér no opiniaun kona-ba ezukusaun ba planu.
Númeru 5 hosi artigu 23 ne’e esplika, Prezidente autoridade ne’e tenke aprova rejimentu internu husi konsellu konsultivu iha sorumutu dahuluk husi konsellu konsultivu ne’e.
Jornalista: Abílio Elo Nini
Editór: Rafael Ximenes de A. Belo
