DILI, 14 novembru 2024 (TATOLI)–Organizasaun Mundiál Ai-han (WFP) no Governu liuhusi Sekretariadu Protesaun Sivil organiza semináriu ho tema “Initiál ba Preparasaun logistika Umanitária” oinsá atu responde ba situasaun emerjénsia ba dezastre oioin kauza husi mudansa klimátika.
“Saída mak lojistika umanitária ne’e elementu importante ida hodi kontribui ba preparasaun no rekuperasaun ba situasaun emerjensia. Ita iha tipu dezastre barak iha Timor-Leste, rai halai, bee sa’e, ahi han rai no rai nakdoko. Entaun, ho grau ne’ebé boot, sa planu ida mak bele responde emerjénsia ida-ne’e,” Sekretáriu ba Protesaun Sivil (SPS), Domingos Mariano Reis, hateten ba jornalista sira iha Hotel Novu Turismu.
Preparasaun rekursu la fásil, tanba ne’e semináriu husi WFP atu ajuda ka hasa’e koñesimentu ba jestór instituisaun relvante ba resposta emerjénsia.
“Ita mobiliza rekursu ba ba resposta emerjensia ne’e la fasil, tanba ida-ne’e mak ohin ita hetan apoiu husi WFP hodi organiza semináriu ida ba jestór sira iha Autoridade Protesaun Sivil (APC), oinsa hasa’e koñesimentu kona-ba mobilizasaun umanitária hodi responde ba emerjensia,” nia dehan.
Governante ne’e esplika, material lojistika ba resposta emejénsia importante, tanba situausan ne’e ida kauza husi alterasaun klimátika ne’ebé sai preokupasaun mundiál, la’ós Timor-Leste de’it, tanba ida-ne’e APC presiza planu ida di’ak ba resposta no rekupera ba vitima sira.
Sekretariu Estadu rekoñese, WFP hanesan parseiru ne’ebé di’ak hodi fó apoiu nesesidade bázika no transporte kazu nesesáriu, nune’e mós parseiru sira IOM no Cruz Vermelha Timor-Leste.
Diretór Adjuntu WFP, Amin Said, hateten WFP serbisu kooperasaun ho autoridade Protesaun Sivil oinsá prepara matéria ba resposta situasaun emerjénsia dezastre naturál, kauza husi mudansa klimátika.
“Ida ne’e haforsa kooperasaun serbisu entre WFP ho Sekretariadu Autoridade Protesaun Sivil oinsá atu bele responde ba kestaun emerjénsia ba iha atuál sistema lojistika umanitaria, liuliu iha emerjénsia ruma ita fasil atu responde situasaun ida emerjénsia iha Timor-Leste,” nia hateten.
Jornalista : Jesuína Xavier
Editór : Cancio Ximenes
