OÉ-CUSSE, 20 Dezembru 2024 (TATOLI) – Estudante finalista na’in-50 husi Ensinu Báziku iha Rejiaun Administrativa Espesiál Oé-Cusse Ambeno (RAEOA) la pasa iha ezame nasionál ne’ebé realiza iha Novembru ne’e.
Diretór Servisu Edukasaun Oé-Cusse, Vincencio Cono, informa alunu husi Ensinu Báziku terseiru siklu ne’ebé aprovadu hamutuk 1.723 no reprovadu 50, husi Ensinu Sekundáriu Jerál hamutuk 1.045 no Ensinu Sekundáriu Tékniku Vokasionál 421 ne’ebé pasa hotu.
Notísia relevante: Estudante 3.260 iha Oé-Cusse mak sei realiza ezame nasionál
Nia esplika katak ba sira-ne’ebé la konsege pasa iha ezame ne’e tanba valór la sufisiente tuir padraun Ministériu Edukasaun nian, katak atu manán tenke hatudu valór di’ak.
“Ensinu Báziku ne’ebé partisipa ezame nasionál iha eskola 22, ne’ebé estudante mak deside rasik no responde rasik liuhusi valór ezame. Ensinu sekundáriu iha eskola hitu no ensinu tékniku vokasionál iha eskola haat”, nia relata.
Tanba ne’e, dirijente Edukasaun Oé-Cusse enkoraja nafatin estudante sira katak kontinua estuda tanba futuru iha liman rasik. “Edukasaun ne’e mai husi tipu tolu mak formál, informál no naun formál, tan ne’e ba estudante sira-ne’ebé remata ona sekundáriu no tékniku vokasionál, balun bele kontinua iha Ensinu Superiór, balun mós bele bá iha sentru formasaun sira, nune’e bele hasa’e tan sira-nia kualifikasaun no balun bele bá iha edukasaun naun formál hanesan kursu lia oioin. Ba sira-ne’ebé la pasa, odamatan eskola nakloke, bele prepara aan kontinua tuir ezame iha tinan oin”, nia fó hanoin.
Iha sorin seluk, Diretór Eskola Sekundária Jerál Palaban, Juvinal da Cruz Salu, dehan ezame nasionál tinan ne’e diferente ho tinan kotuk tanba númeru alunu la pasa aas.
“Maibé tinan ne’e agradese ba oan sira hamutuk ho inan-aman, tanba tinan ne’e hetan valór ne’ebé aas iha ESG Palaban, depois ho prestasaun finalista sira iha tinan ne’e pasa hotu. Susesu ida-ne’e hanesan progresu ida husi inan-aman sira no profesór sira hotu, tanba liuhusi kolaborasaun mak hetan rezultadu di’ak ne’e. Totál estudante ne’ebé sai hanesan finalista ba 2024 hamutuk 394 aprovadu hotu”, nia salients.
Notísia relevante: Estudante na’in-13 iha Oé-Cusse la tuir ezame nasionál
Totál estudante ne’ebé partisipa ezame nasionál 2024 iha Oé-Cusse hamutuk 3.318, kompostu husi Ensinu Sekundáriu Jerál 1.045, Ensinu Tékniku Vokasionál 447, Ensinu Rekorrente na’in-35 no Ensinu Báziku 1.826.
Lembra katak dixiplina ba ezame nasionál ba Ensinu Báziku mak hanesan matemátika, inglés, portugés, istória, jeografia no siénsia naturál inklui tetun.
Ensinu Sekundáriu Jerál mak matemátika, ekonomia kuantitativu, inglés, portugés, kímika, istória, biolojia, sosiolojia, fízika, jeografia no tetun. Ba ensinu Sekundáriu Tékniku Vokasionál mak matemátika, ekonomia kuantitativu, portugés, fízika, kímika, sosiolojia, jeografia no sosiolojia, istória no biolojia.
Jornalista: Abílio Elo Nini
Editora: Maria Auxiliadora
