COVALIMA, 20 janeiru 2025 (TATOLI) – Sentru Solidariedade Sosiál no Inkluzaun (CSSI) Munisípiu Covalima iha 2024 no 2025 ne’e nafatin fó prioridade atu implementa programa haat iha Munisípiu Covalima.
Diretór CSSI, Agapito Assis esplika, programa haat ne’ebé mak atu implementa mak hanesan Reajustamentu Bolsa da Mãe, Asisténsia umanitária, Asuntu defisiénsia no Violénsia Bazeia ba Jéneru (VBJ) no Protesaun ba labarik.
“Kada tinan Ministériu Solidariedade Sosiál no Inkluzaun iha programa no atividade mak hanesan fó prióridade ba programa sira ne’ebé importante hodi fó apoiu ba família vulneravel no seluktan,” Agapito Assis dehan, iha Suai Loro, ohin.
Programa Bolsa da Mãe presiza halo reajustamentu ho objetivu atu hatene dadus mudansa ekonomia família, mudansa ba benefísiariu hanesan parte ida atu atualiza dadus benefísiariu sira.
Programa apoiu asisténsia umanitária mak CSSI Covalima, fó apoiu umanitária ba ema ho defisiénsia, labarik abandonadu, ferik no katuas hela mesak no fó apoiu madre sira, vítima Violénsia bazeia ba jéneru.
Apoiu Violénsia bazeia ba jéneru no protesaun ba labarik sira depende haree ba númeru kazu tanba CSSI Covalima serbisu hamutuk ho rede referál sira hodi refere kazu liga ho vítima vulneravel konsidera menus ai-han nune’e CSSI presiza halo intervensaun.
Molok atu fó apoiu bazeia ba programa prioridade Tékniku sentru solidariedade sosiál no inkluzaun sei halo identifikasaun ba família vulneravel ne’ebé presiza asisténsia umanitária husi CSSI Covalima.
Iha sorin seluk, Xefe Departamentu Asisténsia no Inkluzaun Sosiál, Filomena Alves Barros konfirma, prosesu fó apoiu umanitáriu depende pedidu ne’ebé mak autoridade lokál sira submete ba Sentru Solidariedade Sosiál no Inkluzaun (CSSI).
“Ami fó apoiu asisténsia bazeia ba pedidu ne’ebé autoridade submete hafoin tékniku sira halo verifikasaun apoiu sira ne’e ami fó ema ho defisiénsia, família vulneravel no grupu sira seluk ne’ebé mak presiza atu fó apoiu,” nia reforsa.
Bazeia ba dadus iha 2024 ne’ebé CSSI fó apoiu ona ba ema ho defisiénsia na´in-300, família vulneravel 117 no vítima dezastre naturál hamutuk 21 no apoiu sira ne’e mak hanesan fós no apoiu pakote komplementar seluk hanesan, susu-been, deho, fore-mungu, koto no seluktan.
Notísia relevante:CSSI Covalima halo reajustamentu dadus benefisiáriu bolsa da mãe kondisionál
Jornalista: Celestina Teles
Editór : Rafael Ximenes de A. Belo
